Саудия Арабистонида собиқ ўқитувчи Twitter’даги постлари учун ўлимга ҳукм қилинди

Саудия Арабистони суди 54 ёшли нафақадаги ўқитувчи Муҳаммад ал-Ғамдийни Twitter’даги (ҳозирги Х) постлари учун ўлимга ҳукм қилди.

Инсон ҳуқуқлари ташкилоти аниқлашича, ҳукм 2023 йил 10 июлда чиқарилган. Ал-Ғамдий ҳукм чиқарилгунга қадар бир йил ҳибсда сақланган: у 2022 йил 11 июнда Маккада ҳибсга олинган, бир кишилик камерага жойлаштирилган, мунтазам сўроқ қилинган ва унга адвокат хизматидан фойдаланиш имконияти берилмаган. Human Rights Watch қайд этишича, ал-Ғамдий адвокат билан суд олдида учрашган.

Суд собиқ ўқитувчини бир қанча моддалар, жумладан, қирол ва валиаҳд шаҳзодани ҳақорат қилишда айбдор деб топди. Ўлим ҳукми ал-Ғамдийнинг твитлари, ретвитлари ва YouTubeъдаги ҳаракатлари асосида чиқарилган. Шу билан бирга, Twitterъда собиқ ўқитувчининг бор-йўғи саккизта обуначиси бор ва у асосан бошқаларнинг твитини улашган, ўзи бирор нарса ёзмаган.

Муҳаммад ал-Ғамдийнинг укаси Саид бин Носир ал-Ғамдий — Буюк Британияда муҳожирликда яшаётган мухолифат етакчиси. Саид бин Носирнинг фикрича, акасининг жиноий жавобгарликка тортилиши, биринчи навбатда, унга қондошлиги билан боғлиқ.

Human Rights Watch ташкилотининг қайд этишича, Саудия ҳукумати сўнгги йилларда мухолифатчилар ва хориждаги диссидентларни мамлакатга қайтишга мажбурлаш мақсадида уларнинг оила аъзоларини тез-тез нишонга олмоқда.

Human Rights Watch ташкилоти Саудия Арабистони ҳукуматини Муҳаммад ал-Ғамдийга нисбатан чиқарилган ўлим ҳукмини бекор қилишга чақириб, у ўз фикрларини фақат тинч йўл билан интернетда ифода этганини таъкидламоқда.