2021 йилда комедик актёр Жим Керри иштирокидаги “Ниқоб” фильмининг суратга олинганига 27 йил бўлди. Ажабланарлиси шундаки, ушбу кинокартина ҳали ҳам томошабинларнинг энг севимли фильмлари қаторидан тушмаган. “Ниқоб” фильмининг суратга олиш жараёнлари анча қийин кечди ва бундан ҳам қувонарлиси, суратга олиш гуруҳи барча қийинчиликларни бошдан кечириб томошабинларга қизиқарли фильмни тақдим этишга муваффақ бўлди. “Яндекс Дзен” нашри кинокартина ҳақидаги фактларни тақдим этди.
Ўша пайтдаги визуал эффектлардан фойдаланилганига қарамай, фильмни ишлаб чиқариш учун кам миқдорда — 23 миллион доллар сарфланди. Бундай тежамкорликнинг асосий афзалликларидан бири Жимм Керрига тегишли, чунки унинг ифодали юзи туфайли кинокартина яратувчилари пост-продукцияни яхшилаш учун бир неча баравар камроқ сарфлашлари керак эди.
“Ниқоб” фильмидаги бош ролда бошқа актёрни тасаввур қилиш умуман имконсиз бўлса-да, “New Line” Жим ушбу образни гавдалантиришидан олдин яна бир қанча актёрларни кўриб чиққан. Улар орасида машҳурликка эришган юлдузлар ҳам, Голливуднинг етук актёрлари ҳам бор эди. Энг қизиғи, Николас Кейж ва Метю Бродерик ҳам бош ролга даъвогарлик қилган. Шубҳасиз, студия раҳбарлари тўғри қарор қабул қилган, аммо Кейжни бу ролда кўриш янада қизиқроқ бўлар эди.
“Ниқоб” фильми оригинал маҳсулот эмас, у комикслар сериалининг мослашуви ҳисобланади. Асосий фарқ — бу ҳикоянинг оҳангида. Комиксларда бошқачароқ эди, ниқоб эгаси ўз қурбонларини энг мураккаб усуллар билан йўқ қиларди. Фильмда ҳам худди шундай воқеалар акс этди, бироқ режиссёр Чак Расселл финт ясашга ва содир бўлаётган воқеаларни соф комедияга айлантиришга қарор қилди. Натижада “Ниқоб”нинг сюжети соддалаштирилди, Стенлининг ити Майло ва ёвуз Дориан Тирелл каби қаҳрамонлар бошидан қайта яратилди.
Жим Керрини кадрда кўриши керак бўлган шаклга келтириш учун гримёрларга тўрт соатли машаққатли меҳнат керак эди. Актёрнинг ўзини ҳам, гримёрларнинг ҳам аҳволини тасаввур қилишингиз мумкин – биринчиси жим ўтириш учун қўлидан келганича ҳаракат қилиши керак эди, иккинчиси – актёр қимирламаслиги учун ҳамма нарсани қилиши керак эди.
Ҳеч кимга сир эмаски, фильмларнинг аксарияти вақтни режалаштириш, харажатларни камайтириш учун кетма-кетликда суратга олинади. “Ниқоб” фильмига келсак, банкда бўладиган барча саҳналар бир кунда суратга олинган.
“Ниқоб” Камерон Диас учун катта кино оламига ўзига хос трамплин бўлди, лекин у жуда қийинчилик билан машҳур ролни олишга муваффақ бўлди. “New Line” бош роллардан бирида тажрибаси йўқ актрисани олишга унчалик шошилмаган, сабаби ушбу ролга машҳур актрисалар номзод қилиб кўрсатилган. Режиссёр Чак Расселл Диаснинг танловига шунчалик ишонганки, агар унга бу рол берилмаса, ўз лавозимини тарк этиш билан таҳдид қилган.
“Кубача пит” мусиқий саҳнаси фильмдаги энг машҳур саҳналардан бири бўлиб, унда бош қаҳрамон чиройли, мураккаб қўшиқ, рақс композициясини ижро этади ва йиғилган ҳуқуқ-тартибот идоралари ходимлари ожиз бўлиб қолиб, унга қўшилишади. Бироқ продюсерларга бу саҳна шунчалик ёқмаган, улар бу саҳнани фильмдан кесиб ташламоқчи бўлишди, чунки ижодкорлар уни жуда узоқ вақтни оладиган ва кулгили деб билишди.
Агар рамзий сариқ костюм тўғридан тўғри комикслар саҳифаларидан олинган деб ўйласангиз, адашасиз. Дарҳақиқат, бу Жимнинг онаси у учун биринчи марта стендапда чиққанида тикилган костюмга асосланган эди.
Стенли бузилган машинасини гаражга олиб бориб, ишга лаёқатсиз механиклар билан ишлашга мажбур бўлади. Агар гаражнинг ички қисмида дежавюни ҳис қилсангиз, бу тасодиф эмас. Бу жой аслида “Шарпа овчилари” фильмидаги ўт ўчириш станцияси бўлиб, у ҳақиқий ҳаётда фаолият юритмайди ва ҳозирда асосий туристик диққатга сазовор жой ҳисобланади.
Керри ва Диас рақс билан боғлиқ саҳнани ўзлари ижро этишган бўлса-да, қўшиқ айтиш саҳнаси бир оз бошқача кечди. Жим “Ain’t I good to you ?” таронасини ўзи куйлади, бироқ Диас дублёрнинг ёрдамидан фойдаланишга мажбур бўлди.
“Ниқоб”ни “Оскар” мукофотига сазовор бўлган бошқа фильмлар билан солиштириб мумкин эмас, бироқ фильмдаги визуал эффектларнинг бетакрорлиги борасида баҳслашиб бўлмайди. Улар юқори баҳоланди ва “Ниқоб” фильми “Энг яхши визуал эффектлар” номинациясида “Оскар” мукофотига номзод бўлди. Бироқ фильм ҳайкалчага эга бўла олмади, чунки ушбу номинацияда мукофотни “Форрест Гамп” қўлга киритди.
Шубҳасиз, Керри ўз ижросида мультфильмлардан ҳам, классик фильмлардан ҳам илҳомланган, бироқ шахсий даражада у ўз оиласидан илҳом олган. Актёр интервьюларининг бирида Стенли қиёфасида отасидан фойдаланганини, чунки уларнинг жуда ўхшашлигини айтган.
Жим Керри ўз роли учун ўша давр учун камтарона ҳисобланган 450 000 доллар олган. Бахтли тасодиф туфайли ижодкорлар Керри билан шартномани унинг карьераси тез суръатлар билан бошланишидан олдин имзолашга муваффақ бўлди. Агар бу ҳолат бир оз кечроқ содир бўлса, актёр бемалол ярим миллион эмас, беш, ҳатто етти миллион доллар ҳам талаб қилиши мумкин эди.
Кассадаги муваффақиятдан сўнг, New Line фильмнинг мантиқий давомини суратга олиш режасини ишлаб чиқди ва студия Керрига ўзига хос ролга қайтиш учун ўн миллион доллар таклиф қилди. Бироқ Керри буни рад этди, чунки ўша пайтда унинг лойиҳалари етарли эди, иккинчидан, унинг бу ролга қайтиши мақсадга мувофиқлигига ишончи комил эмас эди. Кейинчалик, “Ниқоб”нинг ўғли ҳақидаги фильм суратга олинди, бироқ бу лойиҳа муваффақиятсиз бўлди.
Фильм Тина ниқобни сувга ташлаши ва Стенлининг ити Чарли унинг орқасидан сакраши акс этган воқеа билан тугайди. Сценарий дастлаб Чарлининг ниқобга кириши ва уни кийиши билан боғлиқ воқеа билан якунланган эди, бу эса лойиҳанинг потенциал давомига дадил ишора қилиш имконини берди. Хабар қилинишича, бу саҳна суратга олинган, бироқ фокус-гуруҳга унчалик ёқмагани учун улар шошиб қайта суратга олиш жараёнларини ташкил қилган.
Изоҳ (0)