“Барби” фильми премьера қилингандан кейин бутун дунё бўйлаб томошабинларнинг ва танқидчиларнинг олқишига сазовор бўлди. Қўғирчоқнинг ғайриоддий саргузашти ҳақида ҳикоя қилинадиган фильм АҚШда энг юқори даромад тўплаган лойиҳага айланди.
Deadline маълумотларига кўра, Барби АҚШда 574,2 миллион доллардан ортиқ даромад тўплаб, “Супер ака-ука Мариолар” фильмини ортда қолдирди.
Шу билан бирга, Марго Робби ва Райан Гослинг иштирокидаги кинокартина бу миқдорни атиги 34 кунда, анимацион фильм эса 138 кун ичида ишлаб топган.
“Барби” кинокартинаси қўғирчоқ, унинг севгилиси Кен ва уларнинг дўстларининг саргузаштлари ҳақида ҳикоя қилади. Сюжетга кўра, Барби Барбиленддан ҳайдалади ва у янги саргузаштларни бошдан кечириш учун ҳақиқий инсонлар дунёсига боришга мажбур бўлади. Фильм тақдим этилгандан кўп ўтмай, дунё бўйлаб машҳурликка эришди.
Лойиҳа тақдим этилган деярли барча бозорларда етакчи ҳисобланади. Шунингдек, кинокартина Грэйта Гервигни жаҳон прокатида 1 миллиард доллар ишлаб топган илк аёл режиссёрга айлантирди.
Фильмда Америка Феррера, Майкл Сера, Уилл Феррелл, Кейт Маккиннон, Симу Лю, Шути Гатва, Эмма Макки ва бошқа актёрлар рол ўйнаган. Маълумот учун, “Барби” фильмига рақобатчи бўлган лойиҳа — “Оппенгеймер” дунё бўйлаб 500 миллион доллар тўплашга муваффақ бўлди.
Изоҳ (0)