Ўзбекистоннинг Кобулдаги элчиси Ёдгорхўжа Шодмонов Афғонистон Миллий телевидениесига берган интервьюсида “Толибон” ҳукуматининг дунё бўйлаб тан олиниши учун иккита асосий талаб борлигини айтди. Суҳбат YouTubeъга жойланди.
Элчи “Толибон” ҳукумати халқаро ҳамжамиятнинг асосий талабларига эътибор қараца, Ўзбекистон ва бошқа давлатлар томонидан тан олинишини таъкидлади.
“Бугунги кунда Афғонистон ҳукуматини тан олиши учун дунё ҳамжамияти томонидан қўйилган талаблар бизга маълум. Доҳада имзоланган Афғонистон ва АҚШ ўртасидаги шартномада кўплаб бандлар келтирилган. Улардан асосийси — Афғонистонда инклюзив ҳукумат ташкил этиш. Бу масала жиддий, бугунги кунда бу борада барча ишлар амалга оширилиб, Афғонистон ҳукуматидан барча миллат ва конфессия вакилллари жой олиши керак, деган талаб бор. Бу дунё ҳамжамиятининг талаби.
Иккинчидан нафақат Афғонистонда, балки бутун дунёда хотин-қизлар ҳуқуқларига риоя этиш талаб этилади. Ўйлайманки, Афғонистон ҳукумати мана шу икки асосий талабга эътибор қараца, нафақат Ўзбекистон, балки бутун дунё ҳамжамияти томонидан тан олинади”, — деб таъкидлади Ёдгорхўжа Шодмонов.
Элчи Афғонистонда иқтисодий инқироздан чиқиш ва гиёҳванд моддаларга қарши курашда ижобий натижалар борлигини, бу борада тегишли ишлар олиб борилаётганини қайд этди.
Ёдгорхўжа Шодмонов Ўзбекистон Афғонистон билан яхши муносабатларни ривожлантиришга интилаётганини қайд этди. Унинг сўзларига кўра, яқин келажакда Ўзбекистон бош вазири ўринбосари бошчилигидаги олий даражали делегация Кобулга келади ва “Толибон” етакчилари билан йирик учрашув ўтказади.
Изоҳ (0)