Фарғона вилояти Қўқон шаҳридаги бозорда яна ёнғин содир бўлгани ҳақида хабарлар тарқалди. Ҳокимлик матбуот хизмати ҳолатга тушунтириш берди.
Унга кўра, Қўқон шаҳар электр тармоқлари корхонасининг берган маълумотларига кўра, жорий йилнинг 26 август куни соат 14:17 да Фаробий кўчасида жойлашган трасформатор ёнаётгани тўғрисида тезкор диспетчерлик бўлимига хабар келиб тушган.
Хабарга асосан “Ҳамза” нимстанциясидан чиқувчи “Янги бозор” узатмаси тармоқдан ажратилди. Жойига етиб келган Қўқон электр тармоқлари мутахассислари Фавқулодда вазиятлар бўлими ўт ўчирувчилари билан ҳамкорликда трансформаторда содир бўлган ёнғинни бартараф этган.
Ёнғиндан фуқароларга жабр етмаган. Дастлабки тахминларга кўра, ёнғин трансформаторга тушган юкламанинг ортиб кетиши натижасида содир бўлган.
Изоҳ (0)