“Чекка ҳудудлардаги поликлиникалар йўқ қилинганди” —  Амрилло Иноятов аҳоли дуч келган қийинчилик ҳақида гапирди

Бухоро шаҳрида “Конституция ўзимизники” шиори остида Конституциявий қонун лойиҳаси бўйича тарғибот тадбири ва концерт дастури бўлиб ўтди. Унда соғлиқни сақлаш вазирлиги расмийси Амрилло Иноятов ҳам иштирок этиб, 15-20 йил олдин аҳоли дуч келган қийинчиликлар ҳақида гапирди.

Тарғибот тадбирида 14 минг 400 киши иштирок этди. Футбол бўйича U-20 Осиё Кубоги—2023 да ғалаба қозонган Ўзбекистон терма жамоаси аъзоси ва паралимпиячи ҳам иштирокчиларни референдумда овоз беришга чақирди. Тадбир давомида Конституцияга киритилаётган янгиликлар тўғрисида, шунингдек, референдум ўтказиш тартиби, унда иштирок этиш бўйича ҳуқуқий тушунтиришлар берилди.

Шуниндек, тадбирда бухоролик тадбиркор Насриддин Рашидов, Қоракўл туманидаги Халқаро математика мактаби директори Темур Рўзиев, бухоролик журналист Обид Шабанов спикер сифатида иштирок этди.

Соғлиқни сақлаш вазирлиги расмийси Амрилло Иноятов 15-20 йил муқаддам тиббиёт жуда оғир аҳволда бўлгани, шифокорларимиз етишмасгани, сабаби улар чет элга ишлагани кетганини айтди.

“Тиббиёт муассасаларимизга дори-дармон етишмасди. Тиббий жиҳозлар етишмовчилиги бор эди. Олис ва чекка қишлоқ ҳудудларида поликниликалар йўқ қилинганди. Аҳолимиз қийналиб, турли йўллар билан ҳатто 70 км узоқликдаги поликлиникаларга, туман марказларига ёки Республикага боришга мажбур бўларди”, — дейди у.

Шуниндек, Иноятов 2016 йилдан бошлаб тиббиётда туб бурилиш бўлгани, қисқартирилган, оптималлаштирилган 2 мингта поликлиникаларимиз қурила бошлаганини қайд этди.

“Уларнинг ичидаги дори-дармон, жиҳозлар янгидан таъмирлана бошланди. Бугун Янги Ўзбекистонимизда янги инқилобий ислоҳотларни ким амалга оширади? Албатта, соғлом халқ, соғлом миллат амалга оширади. Бугун Конститусиянинг 48-моддасида аҳолининг миллий генофони учун шошилинч ва тез тиббий ёрдам бепул экани ва тиббий хизмат, дори-дармон кафолатланган пакетда айрим ҳажмлари аниқ давлат томонидан бепул экани аниқ кўрсатиб берилмоқда”, — дейди расмий.

Иноятов тадбир иштирокчиларига 30 апрелда референдумда қатнашиб, овоз беришини айтди ва референдум жараёнида бефарқ бўлмасликка чақирди.