Зеленский офиси Путин билан музокаралар ўтказиш имкониятини баҳолади

Украина президент офиси раҳбарининг маслаҳатчиси Михаил Подолякнинг сўзларига кўра, ҳозир Россия билан қандайдир тинчлик музокаралари ҳақида гап бўлиши мумкин эмас, чунки ҳозирги вазиятда ҳар қандай музокаралар Украинанинг таслим бўлишини англатади. Музокараларни Украинанинг ҳудудий яхлитлиги тикланган тақдирдагина ўтказиш мумкин, деб тушунтирди Подоляк.

“Яъни, Россия армияси мамлакатимиз чегараларини тарк этганидан кейин. Шунда музокаралар столига ўтириб, уруш натижаларини муҳокама қилиш мумкин. Умуман, минтақадаги хавфсизлик масалаларини муҳокама қилса бўлади. Қолган ҳаммаси уйдирма, Айниқса, тинчлик сўзи. Уруш пайтида тинчлик музокараларини олиб боришнинг иложи йўқ, чунки у ерда сўзсиз бир агрессор давлат бор. Бу баҳсли ҳудуд учун уруш ёки баҳсли можаро эмас”, — деб таъкидлади Подоляк.

У “Россия томонидан бошланган классик ишғол типидаги уруш”ни назарда тутаётганини таъкидлади.

“Агрессор бор. Музокаралар жараёни босқинчи кетганидан кейин бошланади”, — деди Украина президенти офиси раҳбарининг маслаҳатчиси.

Михаил Подолякнинг фикрича, Владимир Путин Украинага қарши урушда ўз мақсадларини қайта кўриб чиққан. Подоляк уларнинг барчасини фантастика деб атади. Унинг сўзларига кўра, Россиянинг ягона мақсади — Украинани “давлат сифатида йўқ қилиш ва иложи борича кўпроқ аҳолисини ўлдириш”.