Zelenskiy ofisi Putin bilan muzokaralar o‘tkazish imkoniyatini baholadi

Ukraina prezident ofisi rahbarining maslahatchisi Mixail Podolyakning so‘zlariga ko‘ra, hozir Rossiya bilan qandaydir tinchlik muzokaralari haqida gap bo‘lishi mumkin emas, chunki hozirgi vaziyatda har qanday muzokaralar Ukrainaning taslim bo‘lishini anglatadi. Muzokaralarni Ukrainaning hududiy yaxlitligi tiklangan taqdirdagina o‘tkazish mumkin, deb tushuntirdi Podolyak.

“Ya’ni, Rossiya armiyasi mamlakatimiz chegaralarini tark etganidan keyin. Shunda muzokaralar stoliga o‘tirib, urush natijalarini muhokama qilish mumkin. Umuman, mintaqadagi xavfsizlik masalalarini muhokama qilsa bo‘ladi. Qolgan hammasi uydirma, Ayniqsa, tinchlik so‘zi. Urush paytida tinchlik muzokaralarini olib borishning iloji yo‘q, chunki u yerda so‘zsiz bir agressor davlat bor. Bu bahsli hudud uchun urush yoki bahsli mojaro emas”, — deb taʼkidladi Podolyak.

U “Rossiya tomonidan boshlangan klassik ishg‘ol tipidagi urush”ni nazarda tutayotganini ta’kidladi.

“Agressor bor. Muzokaralar jarayoni bosqinchi ketganidan keyin boshlanadi”, — dedi Ukraina prezidenti ofisi rahbarining maslahatchisi.

Mixail Podolyakning fikricha, Vladimir Putin Ukrainaga qarshi urushda o‘z maqsadlarini qayta ko‘rib chiqqan. Podolyak ularning barchasini fantastika deb atadi. Uning so‘zlariga ko‘ra, Rossiyaning yagona maqsadi — Ukrainani “davlat sifatida yo‘q qilish va iloji boricha ko‘proq aholisini o‘ldirish”.