Тайван ҳукумати орол атрофида Хитой ҳарбий фаоллиги тикланганини маълум қилди

Тайван ҳукумати орол атрофида Хитой ҳарбий фаоллиги қайта бошлаганини маълум қилди. 25 август куни Хитойнинг 13 та ҳарбий самолёти ва 5 та патрул кемаси Тайваннинг “ҳужумга жавоб қайтариш” зонасига кирган, деб ёзмоқда Reuters Тайван Мудофаа вазирлигига таяниб.

Агентлик маълумотларига кўра, маҳаллий вақт билан соат 7 дан (Тошкент вақти билан 04.00) Тайван ҳарбийлари жами 22 та Хитой ҳарбий самолётини, жумладан, қирувчи ва бомбардимончи самолётлар ҳамда дронларни аниқлаган, улардан 13 таси Тайваннинг ҳаво ҳужумидан мудофаа зонасига кирган. ХХР ҳаракатларининг бошқа тафсилотлари ҳақида хабар берилмаган.

Тайван Хитой армиясини кузатиш учун самолётлар ва кемалар юборди, дейилади баёнотда. Reuters хабарига кўра, Тайван ҳукумати ўзининг “ҳужумга жавоб зонаси” қаерда жойлашганини ошкор этмаяпти, бироқ Тайван бўғозини, шунингдек, оролнинг жануби ва жануби-ғарбий қисмидаги ҳудудни диққат билан кузатиб бормоқда.

Хитой армиясининг “огоҳлантирувчи” машғулотлари

Ўтган ҳафта Хитой ҳарбийлари Тайван атрофида ҳаво ва денгиздан қўшма патруллик машғулотларини ўтказди. Пекин ушбу машқларни “сепаратистларни хорижий унсурлар билан тил бириктириш” оқибатларидан қаттиқ огоҳлантириш деб атади. Машғулотлар ҳарбийларнинг ҳақиқий жанговар шароитларда жанг қилиш қобилиятини синовдан ўтказган.

Тайван маълумотларига кўра, Хитой қирувчи самолётлари орол ҳаво мудофаа зонасига 42 марта учиб кирган, улардан 25 таси Тайван бўғозининг ўрта чизиғини кесиб ўтган. Тайван ҳукумати Хитойнинг “мантиқсиз ва провокацион ҳаракатларини” қоралади.

Машғулотлар бошланишидан бир неча кун олдин Тайван вице-президенти Уилям Лай Парагвайга сафари давомида АҚШда икки марта — Нью-Йорк ва Сан-Франсискода тўхтаб ўтган. Сиёсатчи январь ойида бўлиб ўтадиган президентлик сайловларида иштирок этиш ниятида, айни дамда у фаворит ҳисобланади. Пекин эса Лайни “муаммо” деб атаган ҳамда Хитой суверенитети ва ҳудудий яхлитлигини ҳимоя қилиш чораларини кўришга ваъда берган.

Тайванни ўз ҳудуди деб биладиган Хитой сўнгги йилларда орол ҳукуматининг сиёсий фаоллигига кескин норозилик билдириб, Тайван томон юборилаётган ҳарбий самолётлар сонини оширди. Ўтган йили Пекин орол яқинидаги сувларга денгиз кемалари ва дронларини жўнатишни бошлади.