Ижтимоий тармоқларда давлат ОТМлари педагогик йўналишларга сиртқи ўқув шаклига қабул тўхтаганини, шунинг учун ҳам бу йўналишда хусусий ОТМларда ҳам сиртқида ўқилса, диплом тан олинмаслиги мумкинлиги ҳақидаги хабарлар аҳоли ва жамоатчилик ўртасида турлича талқин қилинмоқда. Олий таълим, фан ва инновациялар вазирлиги бунга аниқлик киритди.
Унга кўра, президентнинг 289-сон қарорига асосан 2023/2024-ўқув йили қабулида педагогик кадрлар тайёрловчи олий таълим муассасаларининг 14 та таълим йўналиши бўйича фақат сиртқи таълим шаклига қабул амалга оширилмади (рўйхат), қолган кундузги ва кечки таълим шакллари бўйича ҳужжатлар қабул қилиш белгиланган.
Бундан ташқари, таълим ташкилотларига қабул қилиш бўйича давлат комиссиясининг тегишли баёни билан сиртқи таълим шаклига камида 5 йил стаж талаб этиладиган таълим йўналишлари тасдиқланган. Булар:
- Бошланғич таълим
- Тасвирий санъат ва муҳандислик графикаси
- Мусиқа таълими
- Жисмоний маданият
- Технологик таълим
Юқоридагилардан келиб чиқиб, президент қарорида кўрсатилган 14 та таълим йўналиши бўйича сиртқи таълим шаклига қабул амалга оширмаслик талаби барча (давлат/нодавлат) таълим ташкилотларига тааллуқли бўлиб, уларга ҳужжатлар қабул қилиш қарор талабларига зид ҳисобланади (ўтган йилги қабуллар бундан мустасно).
Бироқ, ушбу йўналишларнинг кундузги ва кечки таълим шакллари учун қабул амалга ошириш мумкин.
Изоҳ (0)