Бугунги кунда Шарлиз Терон Голливуднинг энг яхши актрисаларидан бири. Бироқ кўпчилик унинг актёрлик соҳасида билими йўқлигини, кино оламига тасодифан кириб келганини билмайди.
Терон Голливудга 18 ёшида кириб келган, бундан олдин эса у жароҳати туфайли балет дарсларини тарк этишга мажбур бўлди ва ўзини моделлик бизнесида синаб кўрди. Шарлизнинг пули жуда кам қолганди ва у қандайдир тарзда Лос-Анжелесдаги банк филиалида жанжал қилишга мажбур бўлди.
У Нью-Йоркдаги модалар каталогида суратга тушгани учун олган чекини нақд пулламоқчи бўлган, бироқ банк ходими чек штатдан ташқарида берилгани учун уни нақдлашдан бош тортган.
“Банк ходимлари чекни қабул қилмади, менга эса пул керак эди. Кассирдан менга ёрдам беришини илтимос қила бошладим. Мен ёлвордим, ялиндим, кейин бир киши келиб, ёрдам беришга ҳаракат қилди”, — дейди Терон Опра Уинфри билан бўлган суҳбатда.
Бўлажак юлдуз ўшанда банкдаги можаро унинг биринчи кастинги бўлишини билмаган эди, чунки раҳмдил инсон Жон Хёрт ва Рене Руссо манфаатларини ҳимоя қилган агент Жон Кросби бўлган. Орадан кўп ўтмай, у Тероннинг агентига айланди.
“Чиқишда ёрдам берган одам менга карточкасини берди. У агар сизга қизиқ бўлса, мен бу борада ёрдам бераман, деди”, — деб эслайди актриса.
Ўз вақтида содир бўлган келишмовчилик сабаб Шарлиз Терон Голливудга кириб келди.
Маълумот учун, актриса Шарлиз Терон 1975 йилнинг 7 август санасида туғилган. У дунёнинг энг кўп гонорар оладиган актрисаларидан бири ҳисобланади. Актриса кинодаги фаолияти давомида “Оскар” ва “Олтин глобус” мукофотларини қўлга киритган.
Шарлиз Терон 2016 йилда Time журнали томонидан дунёнинг энг нуфузли 100 кишисидан бири деб тан олинган. У “Монстр”, “Ўлмас гвардия”, “Форсаж-10”, “Ақлсиз Макс” ва бошқа кўплаб лойиҳаларда суратга тушган.
Изоҳ (0)