Bugungi kunda Sharliz Teron Gollivudning eng yaxshi aktrisalaridan biri. Biroq ko‘pchilik uning aktyorlik sohasida bilimi yo‘qligini, kino olamiga tasodifan kirib kelganini bilmaydi.
Teron Gollivudga 18 yoshida kirib kelgan, bundan oldin esa u jarohati tufayli balet darslarini tark etishga majbur bo‘ldi va o‘zini modellik biznesida sinab ko‘rdi. Sharlizning puli juda kam qolgandi va u qandaydir tarzda Los-Anjelesdagi bank filialida janjal qilishga majbur bo‘ldi.
U Nyu-Yorkdagi modalar katalogida suratga tushgani uchun olgan chekini naqd pullamoqchi bo‘lgan, biroq bank xodimi chek shtatdan tashqarida berilgani uchun uni naqdlashdan bosh tortgan.
“Bank xodimlari chekni qabul qilmadi, menga esa pul kerak edi. Kassirdan menga yordam berishini iltimos qila boshladim. Men yolvordim, yalindim, keyin bir kishi kelib, yordam berishga harakat qildi”, — deydi Teron Opra Uinfri bilan bo‘lgan suhbatda.
Bo‘lajak yulduz o‘shanda bankdagi mojaro uning birinchi kastingi bo‘lishini bilmagan edi, chunki rahmdil inson Jon Xyort va Rene Russo manfaatlarini himoya qilgan agent Jon Krosbi bo‘lgan. Oradan ko‘p o‘tmay, u Teronning agentiga aylandi.
“Chiqishda yordam bergan odam menga kartochkasini berdi. U agar sizga qiziq bo‘lsa, men bu borada yordam beraman, dedi”, — deb eslaydi aktrisa.
O‘z vaqtida sodir bo‘lgan kelishmovchilik sabab Sharliz Teron Gollivudga kirib keldi.
Ma’lumot uchun, aktrisa Sharliz Teron 1975-yilning 7-avgust sanasida tug‘ilgan. U dunyoning eng ko‘p gonorar oladigan aktrisalaridan biri hisoblanadi. Aktrisa kinodagi faoliyati davomida “Oskar” va “Oltin globus” mukofotlarini qo‘lga kiritgan.
Sharliz Teron 2016-yilda Time jurnali tomonidan dunyoning eng nufuzli 100 kishisidan biri deb tan olingan. U “Monstr”, “O‘lmas gvardiya”, “Forsaj-10”, “Aqlsiz Maks” va boshqa ko‘plab loyihalarda suratga tushgan.
Izoh (0)