Ўзбекистонда солиқдан катта миқдорда қарзи бор ўнта йирик корхона маълум қилинди

Мамлакатда солиқдан қарзи энг кўп бўлган йирик корхоналар рўйхатида “Фарғона нефтни қайта ишлаш заводи” биринчи ўринда қайд этилди.

2023 йил 1 август ҳолатига кўра, Ўзбекистондаги ишлаб чиқариш соҳасида солиқ қарзи (100 млн сўмдан юқори) мавжуд корхоналар сони 845 та бўлиб, уларнинг жами қарздорлиги 671,6 млрд сўмни ташкил этди. Бу ҳақда Давлат солиқ қўмитаси хабар берди.

Маълум қилинишича, жами қарздорликнинг 168,5 млрд сўми (25,1 фоизи) солиқ қарзи энг кўп бўлган 10 та корхона ҳисобига тўғри келади.

Ўзбекистонда солиқдан қарзи энг кўп йирик корхоналар ўнталигида Фарғона нефтни қайта ишлаш заводи” биринчи ўринни эгаллаган. Корхона қарздорлиги қарийб 56,6 млрд сўмни ташкил этган. Кейинги ўринлар қуйидагича:

• “Ўзбекгидроэнерго” АЖнинг “Ўрта Чирчиқ ГЭС каскади” УК — 37,4 млрд сўм;
• “Денов вино-ароқ” АЖ — 13,2 млрд сўм;
• “Оқ олтин дон маҳсулотлари” АЖ — 13 млрд сўм;
• “Марҳамат текстиль” МЧЖ — 10,5 млрд сўм;
• “Арнасой голд тех МЧЖ қўшма корхона” — 9 млрд сўм;
• “Оҳангарон шифер” АЖ — 8,9 млрд;
• “Термез Жайҳун слустер” МЧЖ — 6,9 млрд сўм;
• “Қарақалпақ дан маҳсулотлари” АЖ — 6,8 млрд сўм;
• WBМ Qo‘shko‘pir claster МЧЖ — 6,2 млрд сўм.

Йирик корхоналарининг солиқ қарзи энг юқори ҳудудлар сифатида Тошкент вилояти (71,2 млрд сўм), Фарғона вилояти (57,1 млрд сўм) ва Тошкент шаҳри (53,3 млрд сўм) қайд этилган. Солиқдан қарздорлиги нисбатан камроқ йирик солиқ тўловчи корхоналар Навоий вилоятида (8 миллиард сўм) экани кўрсатилган.