Ўзбекистон Озарбайжоннинг ҳудудий яхлитлигини доим қўллаб-қувватлаб келган ва бундан буён ҳам қўллаб-қувватлайди. Бу ҳақда Шавкат Мирзиёев 22 август куни Озарбайжон президенти Илҳом Алиев билан олий даражадаги музокаралардан сўнг ОАВ вакиллари учун баёнотида айтиб ўтди.
Президент Қорабоғда тинчлик ва барқарорлик ўрнатилиши алоҳида аҳамиятга эга эканини қайд этди. Бу ерда олиб борилаётган бунёдкорлик ишларининг кўлами ва суръатини юқори баҳолади.
“Сайловдан кейинги биринчи ташрифимни айнан Озарбайжонга амалга ошираётганим рамзий маънога эга. Бу икки томонлама ҳаморлигимиз энг юксак даражага чиққани, яқинлашишга ўзаро интилиш борлиги, шериклик учун кенг имкониятлар мавжудлигидан далолат беради”, — деди Ўзбекистон президенти.
Икки давлат ўртасида бўлиб ўтган музокаралар натижалари катта мамнуният билан қайд этилди.
“Ўзбекистон билан Озарбайжон ўртасида ҳеч қандай муаммоли масалалар йўқлигини таъкидлаш жоиз. Биз қардош халқларимиз манфаатлари йўлида катта салоҳиятдан самарали фойдаланишнинг янги имкониятлари ва механизмларини излаш долзарб эканига урғу бердик”, — деди давлат раҳбари.
Ўзбекистон ва Озарбайжоннинг Олий давлатлараро кенгашини ташкил этиш тўғрисидаги шартноманинг имзолангани икки томонлама муносабатларда янги босқични бошлаб бериши таъкидланди. Олий даражадаги учрашувлар чоғида кўп қиррали шерикликнинг асосий йўналишлари белгилаб олинди.
Давлат раҳбарлари савдони кўпайтириш, саноат кооперацияси ва логистика инфратузилмасини ривожлантиришга алоҳида эътибор берди. Автомобилсозлик, металлургия, энергетика, қишлоқ хўжалиги, электротехника, тўқимачилик, туризм ва бошқа тармоқлардаги йирик лойиҳалар муҳокама қилинди.
.jpg)
Шунингдек, янги логистика занжирларини ривожлантириш ва инфратузилмани барпо этиш, юк ташиш ҳажмини ошириш бўйича лойиҳаларни амадга оширишга келишиб олинди. Савдо-иқтисодий ҳамкорликнинг яна бир драйвери сифатида икки мамлакат ҳудудларининг имкониятлари максимал даражада ишга солинади. Ҳокимлар ва маъмуриятлар раҳбарлари янги кооперация лойиҳалари ва гуманитар алмашинувни илгари суриш учун жойларда мунтазам учрашади.
Айни пайтда Ўзбекистон ҳудудида Озарбайжон капитали иштирокида 203 та корхона фаолият кўрсатмоқда, улардан 66 таси қўшма корхона ва 137 таси 100 фоиз хорижий капитал иштирокида ташкил этилган. 2020 йилда Ўзбекистон—Озарбайжон ишбилармонлар кенгаши тузилган бўлиб, ҳозирга қадар 3 та учрашув бўлиб ўтди. 2023 йил февралида Ўзбекистон ва Озарбайжон устав капитали 500 миллион доллар бўлган Инвестиция жамғармасини ташкил этди.
2021 йил сентябрида UzAuto Motors ва Ҳожиғабул шаҳридаги SamAuto заводининг йиғиш линияси ишга туширилди. Унда UzAuto Motors нинг барча русумдаги автомобиллари ишлаб чиқарилмоқда.
Туризм индустриясини ривожлантириш, жумладан, туристик оқимларни алмашиш, сайёҳлик йўналишларини яратиш ва инфратузилмани ривожлантириш сайёҳларни янада кўпроқ жалб этиши ва икки давлат ўртасидаги ўзаро тушуниш ва дўстона муносабатларни ривожлантиришга олиб келади.
Музокараларда маданият соҳасидаги алоқаларга ҳам алоҳида эътибор қаратилди. Икки мамлакат ўртасида маданият соҳасидаги алоқалар жадал ривожланмоқда. Мунтазам равишда делегациялар, жумладан, олий даражадаги делегациялар алмашинуви амалга оширилмоқда.
Хусусан, Озарбайжон маданият вазири бошчилигидаги делегация халқаро мақом санъати форумида (2018), Биринчи халқаро халқ амалий санъати фестивалида (2019) ва “Марказий Осиё жаҳон цивилизациялари чорраҳасида” халқаро маданият форумида (2021) иштирок этди. 2019 йилнинг 2—4 ноябрь кунлари Озарбайжон маданияти ва адабиёти кунлари Хоразм вилоятида, 20—23-октябрь кунлари Тошкент, Нукус ва Урганч шаҳардарида, 2022 йил 8-9 апрель – Термиз шаҳрида бўлиб ўтди.
Ўзбекистон Озарбайжоннинг Физули шаҳрида 960 ўқувчига мўлжалланган мактаб қурилишига кўмак бермоқда.
Яқинда Озарбайжонда Ўзбекистон маданияти кунлари катта муваффақият билан ўтди. Ушбу тадбирлар доирасида Бокуда ўзбек мумтоз адабиётининг буюк вакили Абдулла Қодирийнинг озарбайжон тилига таржима қилинган “Ўткан кунлар” романи тақдимот қилинди.
Маданият ва кино кунлари, ижод ва илм-фан арбобларининг учрашувлари мунтазам ўтказиб бориладиган бўлди. 2023 йилда Ўзбекистонда биринчи Ўзбекистон—Озарбайжон ёшлар форуми ташкил этилади.
Етакчилар БМТ, Туркий давлатлар ташкилоти, МДҲ, ЙХҲТ, Қўшилмаслик ҳаракати ва бошқа кўп томонлама институтлар доирасида ҳам самарали мулоқотни давом эттиришга келишди.
“Бугунги музокаралар стратегик шериклик муносабатларини мустаҳкамлашга интилишимиз қатъий эканини яна бир бор намойиш этди. Саъй-ҳаракатларимиз аниқ натижаларга қаратилган”, — деди Шавкат Мирзиёев сўзининг якунида.
Изоҳ (0)