Режиссёр ва актёр ўртасидаги муносабат бир-бирини тушуна олишни талаб қиладиган мураккаб жараён. Аммо улар орасида дарҳол умумий тил топадиган ва бир-биридан чарчамайдиган жуфтликлар бор.
Девид Финчер — Бред Питт
Финчер Бред Питт билан ўзи режиссёрлик қилган 11 та фильмдан 3 тасида ҳамкорлик қилган. Финчер биринчи марта Питтни 1995 йилда “Етти” фильмида ишлашга чақиради. Худди шу йили улар “Монти Пайтон” фильмида ҳам ҳамкорлик қилишади, умуман олганда, уларнинг дунёқараши ўхшашлигини тушунишади. Шундай қилиб, “Жанг клуби” (1999) фильмида Эдвард Нортонга шерик топиш кўп вақт талаб қилмайди. Бред Девидга жуда ишонган, ҳатто саҳналарнинг бирида Нортон Питтнинг қулоғига чинакамига урганида ҳам хафа бўлмаган. Чунки Финчер шундай қилишни талаб қилганди.
Ижодкорларнинг биргаликдаги сўнгги фильми — “Бенжамин Баттоннинг сирли тарихи”(2008). Улар шунингдек, “Жаҳон уруши З-2” устида ҳам ишлашлари керак эди, аммо лойиҳа бекор қилинади.
Кристофер Нолан — Киллиан Мерфи
“Агар фаолиятим давомида Киллианни ҳар бир фильмимда суратга олсам, бахтли бўлардим”, — дейди Нолан.
Режиссёр Мерфи билан деярли 20 йил аввал Бетмен роли учун кастингга келганида ишлай бошлаган. Рол унга насиб этмайди, аммо Киллиан “Муқаддима” (2010) ва “Дюнкерк” (2017) фильмларида иштирок этади. Улар бир-бирларини анчадан бери билишади ва бир-бирига ўхшаш бўлган қарашларини қадрлашади. Уларнинг сўнгги иши “Оппенгеймер” эса иккала ижодкорнинг муваффақиятини яна бир бор таъкидлади.
Жонни Депп — Тим Бёртон
Депп Бёртон ўғлининг чўқинтирган отаси бўлса, Бёртон Деппнинг кинодаги чўқинтирган отаси ҳисобланади. Режиссёр билан учрашишдан олдин Жонни аллақачон машҳур эди, лекин 1990 йилда “Эдвард қайчиқўл” фильми премьерасидан кейин оламшумул машҳурликка эришади. Шундан сўнг “Эд Вуд” (1994), “Уйқу бўшлиғи” (1999), “Чарли ва шоколад фабрикаси” (2005), “Келиннинг жасади” мултфильми (2005) — бош қаҳрамонига овоз беради, “Суини Тодд” (2007), “Алиса мўжизалар мамлакатида” (2010), “Қора шарпалар” (2012), “Ализа кўзгуорти мамлакатида” (2016) фильмларида ҳамкорлик қилишади.
Эмбер Хёрд билан юз берган жанжалдан кейин Депп ва Бёртон ўртасидаги муносабатлар ҳақида турли миш-мишлар тарқалди. Аввалига улар режиссёр дўстини қўллаб-қувватлагани ва ҳатто унга “Аддамслар оиласи” телесериалида рол олиб қўйгани ҳақида ёзишди. Кейин эса актёр Тимнинг лойиҳаларида қатнашмоқчи эмаслигини маълум қилишди. Аммо бу гаплар миш-мишлигича қолмоқда.
Педро Алмодовар — Пенелопа Круз
Ёшлигидан Круз Алмодовар билан суратга тушишни орзу қилган, аммо орзуси бунчалик тез амалга ошишини кутмаганди.
“Менинг барча яқинларим кумирим кимлигини билишарди. Ниҳоят у қўнғироқ қилганида, мен душда эдим. Менга Алмодовар қўнғироқ қилаётганини айтишди, лекин буни ҳазил деб ўйлаб, телефонга жавоб бермаганман”, — деб эслайди актриса.
Шунга қарамай, улар учрашишади ва давримизнинг энг машҳур кино дуэтларидан бирини яратишади. Актриса режиссёрнинг 6 та фильмда суратга тушган: “Тирик тана” (1997), “Ҳаммаси онам ҳақида” (1999), “Қайтиш” (2006), “Ажралган қучоқлар” (2009), “Жуда ҳаяжондаман” (2013), “Оғриқ ва шараф” (2019).
“Пенелопа — замонавий кинодаги энг гўзал аёллардан бири. Уни томоша қилишнинг ўзи катта завқ беради”, — дейди Алмодовар.
Грета Гервиг — Тимоти Шаламе ва Сирша Ронан
Бу ёзнинг асосий ҳити муаллифининг ҳам севимли актёрлари бор. Гервиг Шаламе ва Ронан билан “Леди Бёрд” (2017) ва “Кичик аёллар” (2019) фильмларида бирга ишлаган ва уларни “Барби” (2023) фильмига ҳам таклиф қилган. Аммо актёрлар бошқа фильмнинг суратга олиш ишлари билан банд эди: Шаламе Пол Кингнинг “Вилли Вонка” фильмида ишлаётган бўлса, Ронан “Яйлов” фильмида нафақат рол ўйнаган, балки продюсерлик ҳам қилаётганди.
Квентин Тарантино — Ума Турман
Режиссёр ўзининг севимли актрисаси билан 3 та фильм суратга олган —“Жиноий асар” (1994)дан кейин Тарантино “Биллни ўлдириш” (2003) фильмида ҳам бошқа актрисани хаёлига ҳам келтирмаган. Тарантино унга шунчалик садоқатли эдики, Турманнинг ҳомиладорлиги ҳақида билгач, фильмни суратга олишни бир йилга кечиктиради. Бундан ташқари, “Биллни ўлдириш-2” (2004) фильмини яратишда режиссёр актрисага сценарийга жиддий ўзгартиришлар киритишга ҳам рухсат беради.
Тарантино Турманни Марлен Дитрих билан, ўзини эса унга патологик жиҳатдан ошиқ бўлган режиссёр Жозеф фон Стернберг билан солиштириб, ўз илҳом парисини топганини айтади.
Изоҳ (0)