Ўзбекистоннинг қатор ҳудудларида ноқонуний равишда ўқишни кўчиртириб бериш ҳамда ўқишга киритиб қўйишни ваъда қилган шахслар қўлга олинди, деб хабар беради Бош прокуратура ҳузуридаги департамент.
![](/static/2023/05/Fozilbek/photo_2021-11-22_17-42-39dd.jpg)
Қайд этилишича, департаментнинг Учтепа туман бўлими томонидан ДХХ ва ИИББ ходимлари билан ҳамкорликда тезкор тадбир ўтказилган. Тадбирда А.У. исмли шахс фуқаро Ж.Р.ни танишлари ёрдамида 8 минг АҚШ доллари эвазига Чимкент давлат университетида таҳсил олаётгани тўғрисида ҳужжат тайёрлаб, унинг ўқишини Тошкент тиббиёт академиясига кўчиртириб беришини айтиб, олдиндан 4 минг долларни олган вақтида ашёвий далиллар билан ушланган.
Худди шундай, департаментнинг Бекобод шаҳар бўлими томонидан ДХХ ходимлари билан ҳамкорликда ўтказилган тезкор тадбирда О.Х. исмли шахс фуқаролар Г.Р. ва А.А.нинг қўшни Тожикистон университетидаги ўқишини Чирчиқ давлат педагогика университетига кўчиртириб бериш эвазига 6 минг долларни олган вақтида ашёвий далиллар билан ушланган.
Шу каби, департаментнинг Қўрғонтепа туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда фуқаро Д.А. фуқаро М.А.ни Андижон давлат университетига 2-босқичдан ўқишга киритиб қўйиш эвазига 4 минг АҚШ долларини олган вақтида ашёвий далиллар билан қўлга олинган.
Департаментнинг Бекобод туман бўлими томонидан ДХХ ходимлари билан ҳамкорликда ўтказилган тезкор тадбирда эса М.А. исмли шахс фуқаро М.Ф.ни танишлари ёрдамида Чирчиқ давлат педагогика университетига ўқишга киритиб қўйиш эвазига 3,7 минг долларни олган вақтида ашёвий далиллар билан ушланган.
Департаментнинг Боғот туман бўлими томонидан ДХХ ходимлари билан ҳамкорликда ўтказилган тезкор тадбирда фуқаро Ш.С. фуқаро Г.Х.нинг ишончига кириб, уни Урганч давлат университетига ўқишга киритиб қўйиш эвазига 3,5 минг доллар олган вақтида ашёвий далиллар билан ушланган.
Шунингдек, департаментнинг Булоқбоши туман бўлими томонидан ДХХ ходимлари билан ҳамкорликда ўтказилган тезкор тадбирда Ф.У. исмли шахс фуқаролар М.О. ва Г.Ж.ни қўшни Қирғизистондаги университетлардан бирига ўқишга киритиб қўйиш эвазига 2,8 минг долларни олган вақтида ашёвий далиллар билан қўлга олинган.
Департаментнинг Чилонзор туман бўлими томонидан ДХХ ходимлари билан ҳамкорликда ўтказилган тезкор тадбирда С.Б. исмли шахс фуқаро М.М.ни танишлари ёрдамида қўшни Қозоғистон университетларидан бирида таҳсил олаётгани тўғрисида ҳужжат тайёрлаб, унинг ўқишини Тошкент Алфраганус хусусий институтига 3-босқичдан кўчиртириб бериш эвазига 1,3 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ноқонуний ўқишга киритиш ҳолатлари
Аввалроқ, Фарғона, Андижон, Гулистон давлат университетлари ва “Нархоз”га ўқишга киритиб қўйиш эвазига пул олган шахслар ушлангани хабар қилинганди. Шунингдек, Андижонда ўқишга киритишни ваъда қилиб, 4 минг АҚШ доллари олган ОТМ ходими қўлга олинган эди.