Британия трансатлантик қул савдоси учун Кариб денгизи мамлакатларига 24 триллион доллар миқдорида товон пули тўлаши керак. Бундай фикрни Бирлашган Миллатлар Ташкилотининг Халқаро суди судьяси Патрик Робинсон билдирди.
“Улар (Буюк Британия) ғайриинсонийликни ифодаловчи энг даҳшатли ваҳшийликни эътиборсиз қолдиришда давом эта олмайди. Товон пули бошқа жиноятлар учун тўланган ва инсоният тарихидаги энг даҳшатли ваҳшийлик — трансатлантик қул савдоси учун товон пули тўлаш ҳам тезроқ амалга оширилиши керак”, — дейди у.
“Британия Қироллиги ўз вақтида содир этилган жиноят — қул савдоси учун товон пули тўланишига қарши чиқа олмаслигига ишонаман. Тарих ва қонун буни талаб қилади”, дея қўшимча қилди Робинсон.
Аввалроқ асли Ямайкада туғилган Робинсон Американинг Brattle Group консалтинг компаниясининг Ғарб давлатлари трансатлантик қул савдоси учун товон тўлаши зарурлиги ҳақидаги ҳисоботни тайёрлашида иштирок этган эди.
Июнь ойида чоп этилган тадқиқотда айтилишича, одамлари қул сифатида сотиб юборилган 30 дан ортиқ давлат товон пулига даъвогар бўла олади. Ҳисоботга кўра, Буюк Британиянинг ўзи товон пули сифатида 24 триллион доллар тўлаши, шундан 9,6 триллион доллари Ямайкага йўналтирилиши керак.
Изоҳ (0)