Россия 22 август куни ўзининг янги “Циклон” ракета ташувчисини Қора денгизга олиб чиқди. Бу ҳақда Украина жануби мудофаа кучлари спикери Наталя Гуменюк хабар берди.
Унинг сўзларига кўра, россияликлар бир вақтнинг ўзида жами учта ракета ташувчисини денгизга олиб чиққан. Улар орасида янги “Циклон” кемаси ҳам бор. “Калибр” ракеталарининг умумий сони эса салкам 20 тани ташкил қилиши айтилмоқда.
Гуменюкнинг қўшимча қилишича, рус ҳарбийлари дронлардан фойдаланиб, разведка ишларини олиб борган.
“Бу руслар Украина ҳудудида янги ракета зарбаларини беришга тайёрлигини билдиради”, — дейди украиналик расмий.
“Циклон” Россиянинг “Москва” крейсери чўкиб кетганидан кейин Қора денгиз флотига қабул қилинган биринчи ракета ташувчи кема бўлди.
Уни қуриш 2016 йилда бошланган. 2020 йил июнь ойида ишга туширилган. 2021 йил декабрь ойида кема давлат синовлари учун Севастополга етиб келган. 2022 йил январь ойида синовнинг якуний босқичи бўлиши хабар қилинган.
Изоҳ (0)