2004 йилда АҚШнинг амалдаги президенти Жо Байден уйида ёнғин содир бўлган, унинг рафиқаси ва мушуги нобуд бўлишига бир бахя қолган. Бу ҳақда Байден ўрмон ёнғинлари камида 110 кишининг ҳаётига зомин бўлган Гавайидаги нутқида айтиб берди.
Байден ўз бошидан ўтказганларни Гавайидагиларнинг талафотлари билан солиштиришни истамаслигини айтди. Бундан 15 йил аввал Вашингтондаги Байденнинг уйи яқинида яшин электр тармоғига зарар етказган, шундан сўнг ёнғин чиққан.
“Гапнинг қисқасини айтсам, мен хотинимни, Corvette 67 машинамни ва мушугимни йўқотишимга сал қолган. Мен ўт ўчирувчилар қандай ишлаганини кўрганман”, — деди Байден.
Шу билан бирга, AP агентлигининг ёзишича, 2004 йилда Байденнинг уйидаги ошхонада “кичик ёнғин” содир бўлган, ўт ўчирувчилар уни 20 дақиқа ичида бартараф этишган.
Гавайида ўрмон ёнғинлари 8 август куни бошланди. Сайёҳлар орасида машҳур бўлган Лахайна шаҳри бутунлай ёниб кетди. 14 минг киши эвакуация қилинди.
Гавайи губернатори Жош Грин ўрмон ёнғинларининг Мауига таъсирини “штат тарихидаги энг йирик табиий офат” деб атади. Лахайнани қайта тиклаш қиймати 5,5 миллиард долларга баҳоланмоқда: 2,2 мингдан ортиқ бино шикастланган, 850 гектардан ортиқ ер вайрон қилинган ёки ёниб кетган.
Изоҳ (0)