Украина хавфсизлик хизмати раҳбари Василий Малюк НВ нашрига берган интервьюсида УХХ 2022 йил октябрь ойида Қрим кўпригидаги портлашни қандай амалга оширганини айтиб берди.
Малюкнинг сўзларига кўра, режани ишлаб чиқиш ва уни амалга оширишда шахсан ўзи ва икки ишончли ходими иштирок этган. УХХ раҳбари дастлаб операциянинг турли вариантлари, жумладан, кўприкнинг темир йўл қисмидан фойдаланиш кўриб чиқилганини, аммо якунда портловчи моддалар билан тўлдирилган юк машинаси варианти танланганини айтди.
Кўприкка портловчи моддаларни олиб чиқишда божхона сканерлари уларни аниқлай олмаслиги учун УХХ ҳамма нарсани ҳисобга олган: уларни целлофан плёнка билан ўрашга қарор қилган. Натижада “мутлақо фуқаролик юки”га ўхшаган катта плёнкалар ҳосил бўлган, деб ёзади НВ. Таъкидланишича, бундай ўрамлар бутун контейнерни эгаллаган ва портловчи моддаларнинг умумий оғирлиги 21 тонна тротил муқобили(ўлчов бирлиги)га етган.
.jpg)
Малюк Украинадан портловчи моддалар кўприкка қандай етказилгани тафсилотларини ошкор қилмади, бироқ унинг сўзларига кўра, бутун операция фақат УХХ томонидан амалга оширилган. Бундан ташқари, Малюкнинг қўшимча қилишича, махсус хизматлар GPS-датчикларини блоклаб қўядиган Россиянинг электрон уриш тизимларини ўчиришга муваффақ бўлган. Бу эса юк машинасини кўприк ўртасида портлатиб юборишга имкон берган.
“Биз дўзахнинг еттита айланасидан ўтдик, ўзлари билмаган ҳолда анча одамдан фойдаландик. Руслар 22 кишини қамоққа ташлади. Уларнинг барчаси терактда иштирок этишда айбланмоқда. Аслида улар одатдаги кундалик ишлари билан шуғулланган. Улар оддий рус контрабандачилари эди”, — дейди УХХ раҳбари.
Аввалроқ Василий Малюк Украина кучлари томонидан 17 июль куни Қрим кўпригига уюштирилган иккинчи ҳужум тафсилотларини ошкор қилганди. Малюк ҳужумда 850 килограмм портловчи моддалар ортилган Sea Baby дронидан фойдаланилганини айтди. У дронни Россиянинг Украинага бостириб киришидан сўнг бошланган бир неча ойлик ишланмалар натижаси деб атади. УХХ CNN телеканалига Қрим кўпригидаги ҳужум видеосини ҳам берди.
Изоҳ (0)