Тошкент шаҳри қачон Ўзбекистон пойтахти мақомига эга бўлганди?

Тошкент шаҳри Ўзбекистон пойтахти бўлганига 93 йил тўлди. Шу муносабат билан шаҳар ҳокимлиги айрим маълумотларни очиқлади.

1930 йилнинг 17 август куни ЎзССР Марказий ижроия қўмитасининг 155-сонли қарори билан Ўзбекистон пойтахти Самарқанд шаҳридан Тошкентга кўчирилган.

Ўтган 93 йил давомида Тошкентда кўп ўзгаришлар рўй берган.

Хусусан, пойтахт майдони 2 баробардан зиёдга ортиб, 44 минг гектарга етган. Салкам 1 асрлик вақт давомида шаҳар аҳолиси 350 минг нафардан 3 миллион кишига етган.

“Бугунги кунда Тошкент нафақат мамлакатнинг ижтимоий, иқтисодий, сиёсий ва маданий маркази, пойтахти, балки Марказий Осиёдаги энг юқори суръатларда ривожланиб бораётган йирик шаҳардир. Шу йиллар давомида пойтахтимиз тинчлик шаҳри, дўстлик шаҳри, нон шаҳри, Ислом маданияти пойтахти деган юксак эътирофларга эришди. 2200 йиллик шонли тарихини нишонлади”, — дейилади ҳокимлик ахборотида.

Айни пайтда Тошкентда 212 та йирик саноат корхоналари, 8 150 та қўшма корхоналар, 11 242 та кичик саноат корхоналари ҳамда 82 951 та кичик бизнес субъектлари фаолият юритмоқда.

Пойтахт саноатининг республикадаги улуши 54,7 фоиз, хизматлар соҳасидаги улуши эса 40,3 фоизни ташкил этмоқда. Бугунгача ўзлаштирилган хорижий инвестиция ва кредит маблағлари 385,4 миллион доллар бўлиб, тўғридан тўғри хорижий инвестиция 270,5 миллион долларни ташкил этмоқда.