Тошкент метрополитенининг Юнусобод йўналишидаги “Юнусобод” ва “Туркистон” бекатлари 4 ой муддатга ёпилади. Бу ҳақда метрополитен матбуот хизмати хабар берди.
Маълум қилинишича, ушбу бекатлар қарийб 3 йилдан буён йўловчиларга хизмат кўрсатиб келмоқда. Жаҳон тажрибасидан келиб чиққан ҳолда, метро поездлар ҳаракати ва йўловчилар хавфсизлигини таъминлаш ҳамда сифатли хизмат кўрсатиш мақсадида, ерости метро туннеллари ва бекатлари маълум муддат эксплуатация қилинганидан сўнг, режали профилактик ишларни амалга ошириш лозим.
Шу муносабат билан Юнусобод йўналишининг “Туркистон” ва “Юнусобод” бекатлари 2023 йил 26 август санасидан бошлаб 4 ой муддатга ёпилади ва бу муддат давомида режали профилактик ишлар амалга оширилади.
Маълумот учун Юнусобод йўналишининг I босқичи 2001 йилда ишга туширилганидан сўнг, режали профилактик ишларни амалга ошириш учун 2002 йил, 3 ой муддатга ёпилган.
Шунингдек, поездлар ҳаракати “Шаҳристон” ва “Мингўрик” бекатлари оралиғида одатий тарзда ҳаракатланиши давом этади ва бу йўналишда поездлар ҳаракати оралиқ вақти (интервал) 5 дақиқагача қисқартирилади.
Тошкент метрополитени йўловчиларга ноқулайлик ҳосил қилмаслик мақсадида, “Туркистон”—“Юнусобод”—“Шаҳристон” метро бекатлари оралиғида бепул хизмат кўрсатувчи катта сиғимли автобуслар (метробус) ҳаракати йўлга қўйилади. Ушбу автобусларнинг кунлик иш вақти тонги 06:00 дан тунги 00:00 га қадар амалга оширилади.
“Келтирилган ноқулайликлар юзасидан йўловчилардан узр сўраймиз”, — дейилади хабарда.
Тошкент метрополитенининг Юнусобод йўналишидаги янги “Юнусобод” ва “Туркистон” бекатлари ишга тушиши билан янги 124 та иш ўрни яратилган эди. 2001 йилда қурилиши бошланиб тўхтатилган лойиҳа 1990 йилларда “Мингўрик”, “Бодомзор”, “Шаҳристон” бекатлари қурилгач, 200 метр масофадан сўнг ерусти сувлари баланд бўлгани сабабли эски технологияларнинг кучи етмаслиги натижасида қурилиш тўхтатилган. Бироқ метро йўналишининг иккинчи босқичи қурилиши президент Шавкат Мирзиёевнинг 2016 йил 7 ноябрдаги қарорига мувофиқ 2017 йилнинг январь ойида бошланган эди. Германиядан харид қилинган янги ускуна ерости сувларига бардошли саналиб, сувли жойдан темир-бетон тюбинг қўйиш орқали ўтилган.
Изоҳ (0)