Xorijlik san’atkorlar muxlislar ta’qibiga uchragani va unga suiqasd uyushtirishga urinishgani haqida ko‘p eshitganmiz. Qarangki, o‘zbek san’atkorlari orasida ham bunday “muxlislar”dan bezor bo‘lganlar bor.
Feruza Normatova: “Umra safarigacha kuzatib borishibdi”
— Avvaliga bu haqida aytishimni ota-onam istashmagan edi. Atrofimda psixopad insonlar paydo bo‘lib qolgan. Hatto, Sirdaryodagi uyimning ham manzilini topib boribdi. Undan keyin Toshkentdagi uyimga ham keldi. Eshikni ochmay, “Kim bu?” desam ismini aytib, gapi borligini aytyapti. Hayronman, u qulfli eshikni qanday ochdi? Eng hayratlanarlisi, u oilam bilan Umra safariga borganimda ham xuddi o‘sha guruh bilan borgan. Aeroportda telefonimning quvvati tugab, bir muddat quvvatlagich oldida turganman. Instagram sahifasini kuzatsam bir chekkada turib, meni videoga olgan va tarmoqqa joylashtirgan. U ortimdan izma-iz kuzatgan. Turfirma bilan bog‘lansam, men Instagram’ga reklama joylagan kunim joy bron qilgan ekan. Unga nima kerak, hayronman. Yaqinda avtoturargohda tursam bir yigit kelib, “Eshikni oching” deb ta’qib qilgandi. O‘ylab qarasam bu voqealarning bari bir-biriga uzviy bog‘liqdek tuyulyapti. Shu bois aka-ukalarim bilan bir uyda turishga qaror qildim. Meni yolg‘iz deb o‘ylayotganlar adashadi, — deydi aktrisa Feruza Normatova.
Munisa Rizayeva: “Ikkita qo‘riqchimni pichoqlashgan”
— To‘yda qiziqarli voqealar bilan birga xavfli vaziyatlar ham bo‘ladi. Chunki kimning nima maqsadda ekanligini bilmaysiz. Keyingi paytlarda yoshlar orasida pichoqbozlik holatlari ko‘payib ketgan. Ilgari yigitlar urishish paytda pichoq chiqarishsa, “O‘zing urisholmaysanmi?” deb mazax qilishardi. Hozir aksincha, oldida pichoq olib borish obro‘dek bo‘lib qolgan. Yaxshi hamki, bunday vaziyatlarning oldini oladigan, ularga qarshi chora ko‘radigan ichki ishlar xodimlari bor. Ikki marta qo‘riqchimni pichoqlashgan.
Bittasining oyoqlariga tiqilgan pichoqni ko‘rib, qo‘rqib ketganman. Yaxshiyamki, ularni tezda kasalxonaga olib borganmiz. Bu ishni qilganlar esa tegishli tartibda javobgarlikka tortilgan. Bunday vaziyatlarga ko‘p uchraganim uchun ko‘nglim bo‘lmagan to‘yxonada qo‘shiq kuylamayman. Chunki ko‘nglim bo‘lmay kirgan to‘yxonada mushtlashuv yoki hech bo‘lmaganda chiroq o‘chishi bilan bog‘liq vaziyat bo‘ladi, — deydi xonanda Munisa Rizayeva.
“G‘ayrat Usmonov kelmasa, o‘zimni tomdan tashlayman, degan”
— To‘ylar, konsertlar bilan bog‘liq qiziqarli voqealar juda ko‘p bo‘ladi. Sizga eng kulgili va eng qayg‘ulisini aytib beraman. Xullas, vohada xizmatda edik. Bir kundan keyin stadionda konsert berishimiz kerak edi. Ashaddiy muxlislardan biri bir kun avval tunab qolgan mehmonxonamizga borib, “G‘ayrat Usmonov bilan uchrashmoqchiman”, debdi. Mehmonxona xodimi ketganimni aytgan. Ammo singlimiz gapiga ishonmay, xodim bilan janjallashgan. Eng yomoni, mehmonxona yaqinidagi to‘rt qavatli binoning tomiga chiqib, “G‘ayrat Usmonov kelmasa, o‘zimni shu yerdan tashlayman”, deb tahdid qilgan.
Baqir-chaqirdan keyin tuman rahbarlari ham o‘sha yerga borishgan. Jahl otiga mingan muxlisa singlimizni tinchlantirish oson kechmagan. Ertasi kungi konsertda old qatoriga o‘tkazib, vaziyatni yumshatganmiz. Keyinchalik bilsam, u bir kun avvalgi to‘yda men bilan suratga tusholmaganining alamidan shunday qilgan ekan.
Lola Ahmedova: “U nosog‘lom inson ekan”
Bir necha yil avval Lola Ahmedovaning “ashaddiy muxlisi” gazetalarga maktub yo‘llab, uni chop etmasa, sudga berish bilan tahdid qilar edi. Vaziyat shunchalik jiddiylashdiki, u xonandaning oilasi haqida ham bo‘htonlar yozib, tarqatdi.
— Bu inson bilan ro‘baro‘ keldim. Suhbatlashdim. O‘zimni ko‘rsa, sen bilan ishim yo‘q, deydi. Lekin buning tagiga yetganimizda u kishining ruhiy nosog‘lom ekanligini aniqladik. Yoki bu ish kimgadir kerakmikan? Buni vaqt ko‘rsatadi. Bu insondan ruhiy kasalliklar shifoxonasiga joylashtirganimizdan so‘nggina qutuldik. U haqiqatan ham nosog‘lom, noadekvat inson. U inson mening muxlisim bo‘lganida, tinchimni buzmasdi. U tufayli ancha ovora bo‘ldim, asablarim buzildi. Prokuratura xodimlariga murojaat qilishga to‘g‘ri keldi. U achinishga loyiq. Uning onasi bilan suhbatlashishganida, “O‘g‘lim Lolaning muxlisi, uni yaxshi ko‘radi, men hech narsa qilolmayman” degan ekan. U inson 42 yoshida bo‘lishiga qaramay, oila qurmaganligi uning ruhiy nosog‘lom ekanligini tasdiqlaydi, — deydi xonanda Lola Ahmedova.
Anvar Sanayev: “Sudga berib qutildim”
— Aslida xonanda muxlislar uchun ijod qiladi, ammo barmoqlar barobar bo‘lmaganidek, fanatlar ham turlicha bo‘ladi. Eshigimning tagiga kelib, “Anvar Sanayevni ko‘rmaguncha ketmayman”, deganlar ham bo‘lgan. Uyda bo‘lsam ular bilan uchrashaman, ammo xizmat safari bilan ketganimni aytishsa ham ketmay bir necha kunlab kutganlar bo‘lgan. Bir muxlisa qiz bo‘lardi, “Menga uylaning” deb xat yozaverardi. Avvaliga, buni shunchaki hazil deb o‘yladim. Qarasam, bu ta’qibga aylanib ketyapti. Oxiri uni sudga berishga majbur bo‘ldim. Mana shundan keyin tinchidi, — deydi xonanda Anvar Sanayev.
Izoh (0)