Тадбиркорлар билан ўтказилаётган очиқ мулоқотда президент Шавкат Мирзиёев экспортни кенгайтириш бўйича яна бир катта имконият – бу нуфузли хорижий брендларни Ўзбекистонга жалб қилиш эканини таъкидлади.
Давлат раҳбарига кўра, йиллик бозори 100 миллиард доллардан ошадиган дунёнинг энг машҳур 50 та бренди Ўзбекистон корхоналари билан ишлашга катта қизиқиш билдирмоқда. Испания, Германия, Польша, Туркиянинг йирик брендлари билан музокаралар ўтказилган. Улар маҳаллий корхоналаримизга 3 миллиард долларлик буюртма беришга ҳозирнинг ўзида тайёр.
Бунда 3 та энг катта масала ҳал қилинади. Жумладан:
- ишлаб чиқаришга халқаро стандартлар, экология ва сертификатлаш талаблари жорий қилинади. Бунинг учун маҳаллий корхоналарнинг мутахассислари уларнинг талаби асосида ўқитилади;
- маҳаллий корхоналардаги ишчиларга муносиб меҳнат шароитлари яратиб берилади;
- брендларнинг маҳсулотларини олиб кириш ва экспорт қилиш учун қулай божхона режими жорий қилинади.
Йирик брендларни жалб қилган корхоналарга 50 миллион сўмдан грант ажратилади.
Президент Германиянинг “Дизел” брендини жалб қилган Намангандаги “Фазман текстиль” корхонасига ҳамда АҚШнинг Nike брендини жалб қилган Андижондаги “Сино интернейшнл” корхонасига биринчи бўлиб ушбу грантни беришни таклиф қилди.
Бундан олдин Шавкат Мирзиёев 2023 йил олти ойида текширишлар ўтган йилнинг мос даврига нисбатан 40 фоизга камайганини маълум қилганди. Таъкидланишича, ўтган бир йилда кичик тадбиркорлар сони 40 минг нафарга кўпайган, ўрта тадбиркорлар сони 2 минг нафарга ошиб, 10 мингга етган. Йирик корхоналар сони эса бир йилда 400 тага кўпайиб, 1,5 мингта бўлган. Шунингдек, президент Ўзбекистон айрим мамлакатлар каби нефть-газ ресурсларини сотиш ҳисобига юқори иқтисодий ўсишни таъминлай олмаслигини айтди.
Изоҳ (0)