Uzbekistan Airports компанияси “Тошкент-3” маҳаллий авиақатновлар терминали олдидаги майдонни реконструкция қилишни бошлади. Лойиҳага кўра, автотранспорт воситаларининг терминал олдига кириши соддалаштирилади. Бу ҳақда компания матбуот хизмати хабар берди.
Қайд этилишича, учта алоҳида йўлак ажратилади: аэропортнинг расмий таксилари, сайёҳлик автобуслари ва микроавтобуслар, шунингдек, ҳудудга 5 дақиқагача киришга рухсат берилган барча автомобиллар учун.
Автомобильларнинг одамларни кутиб олиш ва кузатиш йўлаги халқаро авиақатновлар терминалидаги йўл ўтказгич (эстакада) тамойили асосида ишлайди. Автомобильнинг йўлакда туриш вақти 5 дақиқадан ошиб кетган тақдирда, ўрнатилган ва ЙҲХБ билан интеграциялашган камералар қоидабузарларга автоматик равишда жарималар юборади.
Вокзал майдонини реконструкция қилиш ишлари Вазирлар Маҳкамасининг 2023 йил 17 апрелдаги 159-сонли “Аэропортлар, темир йўл ва автовокзалларда хизмат кўрсатиш сифатини оширишга қаратилган қўшимча чора-тадбирлар тўғрисида”ги қарори ижроси доирасида амалга оширилмоқда. Реконструкция ишларини 2023 йил август ойи охиригача якунлаш режалаштирилган.
Шунингдек, 2024 йилнинг 1 январига қадар Ўзбекистондаги барча халқаро аэропортларда ҳам терминал атрофи ҳудудларини реконструкция қилиш ишлари амалга оширилади.
Тошкент халқаро аэропорти эстакадаси
20 йилдан ортиқ (1999 йилда Тошкентда содир бўлган терактлардан сўнг) муддат давомида кутиб олувчи ва кузатувчилар пойтахт аэропортининг терминал биносига кириш имконига эга эмас ва ҳар қандай об-ҳаво шароитида ҳам ташқарида бўлишлари талаб қилинади. Халқаро аэропортда кутаётганлар учун айвон мавжуд, аммо маҳаллий авиатармоқлар терминали олдида одамлар кўчада кутишига тўғри келади. 2021 йилнинг июлида аэропортининг эстакадаси транспорт ҳаракати учун тест режимида очилганди. Бутун эстакада бўйлаб транспорт воситаларининг рақамларини танийдиган, турини аниқлай олувчи ва улар томонидан йўл ҳаракати қоидаларига риоя қилинишини назорат этувчи интеллектуал видеокузатув камералар тизими ўрнатилган.
Изоҳ (0)