Айни пайтда Шавкат Мирзиёев Халқаро конгресс марказида Ўзбекистонда тадбиркорликни ривожлантириш борасидаги устувор вазифалар тўғрисида нутқ сўзламоқда.
.jpg)
Президент янги бозорларга сифатли ва рақобатбардош маҳсулот билан кириш масаласига тўхталди.
“Мавжуд нефть-газларимизни сота олмаймиз, у халқимизга керак. Бу йил бу борада кўп ишлар қилдик, буни қишда халқимиз сезади. Бир нарсани тўғри тушуниш керак. Биз айрим мамлакатлар каби нефть-газ ресурсларини сотиш ҳисобига юқори иқтисодий ўсишни таъминлай олмаймиз. Бизнинг нефтимиз ҳам, газимиз ҳам бу – сиз каби ташаббускор ва ишбилармон тадбиркорлар хом ашёдан яратаётган юқори қийматли ва сифатли маҳсулотлардир”, — деди давлат раҳбари.
Маҳсулотлар ташқи бозорларда сифатли, талабгорлиги юқори ва рақобатбардош бўлиши учун ишлаб чиқаришни мутлақо янги босқичга олиб чиқиб, кескин ўсиш қилиш зарурлиги таъкидланди.
Халқаро майдондаги вазият ҳисобига логистика харажатлари 3-4 баравар ошиб кетганини ҳисобга олиб, давлат экспортчи корхоналарни қўллаб-қувватлашни изчил давом эттиради. Улар учун молиявий имкониятлар янада кенгайтирилади.
Логистика харажатларини компенсация қилишга қўшимча 100 миллион доллар йўналтирилади. Шунингдек, маҳсулотларни хорижда сертификатлаш, халқаро стандартларни жорий қилиш ва бу борада мутахассис тайёрлашга яна 25 миллион доллар ажратилади.
“Янги Ўзбекистон – рақобатбардош маҳсулотлар юрти” дастури жорий йилда ҳам давом эттирилади ва дастур билан қамраб олинадиган корхоналар сони 500 тага етказилади. Улар учун дастурдаги барча имтиёзлар давом эттирилади.
Бундан олдин Шавкат Мирзиёев 2023 йил олти ойида текширишлар ўтган йилнинг мос даврига нисбатан 40 фоизга камайганини маълум қилганди. Таъкидланишича, ўтган бир йилда кичик тадбиркорлар сони 40 минг нафарга кўпайган, ўрта тадбиркорлар сони 2 минг нафарга ошиб, 10 мингга етган. Йирик корхоналар сони эса бир йилда 400 тага кўпайиб, 1,5 мингта бўлган.
Изоҳ (0)