Tadbirkorlar bilan o‘tkazilayotgan ochiq muloqotda prezident Shavkat Mirziyoyev eksportni kengaytirish bo‘yicha yana bir katta imkoniyat – bu nufuzli xorijiy brendlarni O‘zbekistonga jalb qilish ekanini taʼkidladi.
Davlat rahbariga ko‘ra, yillik bozori 100 milliard dollardan oshadigan dunyoning eng mashhur 50 ta brendi O‘zbekiston korxonalari bilan ishlashga katta qiziqish bildirmoqda. Ispaniya, Germaniya, Polsha, Turkiyaning yirik brendlari bilan muzokaralar o‘tkazilgan. Ular mahalliy korxonalarimizga 3 milliard dollarlik buyurtma berishga hozirning o‘zida tayyor.
Bunda 3 ta eng katta masala hal qilinadi. Jumladan:
- ishlab chiqarishga xalqaro standartlar, ekologiya va sertifikatlash talablari joriy qilinadi. Buning uchun mahalliy korxonalarning mutaxassislari ularning talabi asosida o‘qitiladi;
- mahalliy korxonalardagi ishchilarga munosib mehnat sharoitlari yaratib beriladi;
- brendlarning mahsulotlarini olib kirish va eksport qilish uchun qulay bojxona rejimi joriy qilinadi.
Yirik brendlarni jalb qilgan korxonalarga 50 million so‘mdan grant ajratiladi.
Prezident Germaniyaning “Dizel” brendini jalb qilgan Namangandagi “Fazman tekstil” korxonasiga hamda AQSHning Nike brendini jalb qilgan Andijondagi “Sino interneyshnl” korxonasiga birinchi bo‘lib ushbu grantni berishni taklif qildi.
Bundan oldin Shavkat Mirziyoyev 2023-yil olti oyida tekshirishlar o‘tgan yilning mos davriga nisbatan 40 foizga kamayganini ma’lum qilgandi. Ta’kidlanishicha, o‘tgan bir yilda kichik tadbirkorlar soni 40 ming nafarga ko‘paygan, o‘rta tadbirkorlar soni 2 ming nafarga oshib, 10 mingga yetgan. Yirik korxonalar soni esa bir yilda 400 taga ko‘payib, 1,5 mingta bo‘lgan. Shuningdek, prezident O‘zbekiston ayrim mamlakatlar kabi neft-gaz resurslarini sotish hisobiga yuqori iqtisodiy o‘sishni taʼminlay olmasligini aytdi.
Izoh (0)