Беларусь президенти Александр Лукашенко украиналик журналист Диана Панченкога берган интервьюсида, ядро қуролидан фойдаланиш эҳтимоли ҳақидаги саволларга жавоб берди.
Лукашенконинг сўзларига кўра, агар мамлакатга тажовуз бўлмаса, бошқа ҳолатда ядро қуроли қўлланмайди.
“Агар бизга қарши тажовуз бўлса, Беларусга ҳужум қилинган тақдирда, биз иккиланмаймиз, кутмаймиз. Биз арсеналимиздан тийиб туриш учун фойдаланамиз. Тажовуз содир бўлиши биланоқ, режага кўра, ўзимиздаги бор нарсалар билан жавоб қайтарамиз.
Биз кимнидир қўрқитиш учун ядро қуролини олиб келганимиз йўқ. Тўғри, ядровий қурол кучли тийиб турувчи восита. Лекин булар стратегик эмас, тактик ядро қуроллари. Шунинг учун, бизга қарши тажовуз содир бўлган заҳоти ундан дарҳол фойдаланамиз”, — дейди у.
Лукашенко беларусларнинг ақли жойида экани ва ядро қуролидан фойдаланишни истамаслигини таъкидлади. У Украина ва Ғарб давлатларини ҳам огоҳлантирди:
“Украинага қарши, агар у бизга тажовуз қилса, нафақат ядро қуроли, ундан ташқари воситаларимиз ҳам бор. Сизни огоҳлантириб ўтирмаймиз, агар қизил чизиқларни кесиб ўтсангиз, (Украинадаги) қарор қабул қилиш марказларига зарба берамиз. Шундай экан, бизга тегманг. Биз ҳам сизга тегмаймиз. Бу нафақат Украинага, биринчи навбатда, Ғарбдаги бунга тайёргарлик кўраётган телбаларга тегишли”.
Беларусда ядровий қурол жойлаштирилиши
25 май куни Минскда Россия мудофаа вазири Сергей Шойгу ва Беларусь мудофаа вазирлиги раҳбари Виктор Хренин ўртасида учрашув бўлиб ўтди, унда стратегик бўлмаган ядро қуролларини Беларусь Республикасига жойлаштириш тўғрисидаги ҳужжат имзоланди.
“Россия Беларусга ядро қуролини бермаяпти: улар устидан назорат ва улардан фойдаланиш бўйича қарор Россия томонида қолади”, — деди Шойгу.
Шунингдек, у Москва ҳарбий-сиёсий вазиятни ҳисобга олган ҳолда, келажакда “Иттифоқ давлати хавфсизлигини таъминлаш бўйича қўшимча чоралар” кўриш ниятида эканини айтди. Россия мудофаа вазири аллақачон кўрилган чоралар барча мавжуд халқаро-ҳуқуқий мажбуриятларга мос келишини билдирди.
Ўша куни Александр Лукашенко Минск Россиядан келаётган ядро қуроллари хавфсизлиги учун масъул эканини таъкидлади ва унинг мамлакати ҳудудига ҳеч қандай диверсантлар кира олмаслигини айтди.
26 май куни Украина президенти девони раҳбари маслаҳатчиси Михаил Подоляк Россиянинг қўшни Беларусда ядро қуролини жойлаштириши Ядро қуролини тарқатмаслик тўғрисидаги шартномани бузиш эканини билдирди.
Изоҳ (0)