“Кудбиев деган каттакон, сенга баҳо бу, сенинг тизимингга баҳо бу” — Шавкат Мирзиёев Тах Gap тизимини танқид қилди

Тадбиркорлар билан ўтказилаётган очиқ мулоқотда Шавкат Мирзиёев содда солиқ маъмурчилиги ва бюрократиясиз қулай муҳит яратиш борасида муҳим ташаббусларни илгари сурди.

Давлат раҳбарининг таъкидлашича, ҳозирги тадбиркорларни хавф гуруҳига киритиш тизими ёпиқ бўлиб, интизомли солиқ тўловчилар ҳам қайсидир ҳамкори қачонлардир хато қилган бўлса, унинг учун ҳам жавоб бермоқда.

Ўтказилган сўровларда қўшилган қиймат солиғи тўловчиларнинг 70 фоизи ушбу солиқни қайтаришда солиқ узилиши коэффициентини қўллаш, яъни Тах Gap тизими адолатсиз эканини билдирган. Солиқ тизимидаги коррупция билан боғлиқ шикоятлар ҳаддан ташқари кўпайиб кетгани ҳам айнан Тах Gap билан боғлиқ.

“Олаётган ойликларингни оқламаяпсизлар, халққа, тадбиркорга ёрдам бермаяпсизлар, тўсиқ бўляпсизлар. Мана, Тах Gap деган бало буларни қандай қийнаяпти, коррупцияга сабаб бўлаётгани учун тикка туриб қарсак чаляпти”, — деди президент Солиқ қўмитаси раиси Шерзод Кудбиевга.

Давлат раҳбари 1-октябрдан бошлаб, қўшилган қиймат солиғини қайтаришда солиқ узилиши коэффициентини қўллаш амалиёти, яъни Тах Gap бекор қилинишини маълум қилди.

Шу билан бирга, Савдо-саноат палатаси, Бизнес-омбудсман соҳа вакиллари билан бирга тадбиркорларнинг очиқ-ошкора рейтингини жорий қилади.

Бунда, келгуси йил 1 январдан бошлаб рейтинги юқори корхоналар:

• барча турдаги солиқ текширувларидан озод қилинади;
• уларга қўшилган қиймат солиғининг ортиқча қисми бир кунда қайтариб берилади;
• қўшилган қиймат солиғи тўловчиси гувоҳномасини вақтинчалик тўхтатиб туриш амалиёти бекор қилинади.

Август бошида Президентнинг тегишли қарори билан Вазирлар Маҳкамаси ҳузуридаги Солиқ қўмитаси раиси лавозимига Шерзод Кудбиев тайинланганди. Шу муносабат билан у Ўзбекистон иқтисодиёт ва молия вазири лавозимидан озод этилган.

Шерзод Кудбиев Давлат солиқ қўмитасини 2020 йил май ойидан 2022 йил охиригача бошқарган. У бунга қадар президентнинг давлат хизмати ва вакиллик органлари билан ўзаро ҳамкорлик масалалари бўйича маслаҳатчиси, бандлик ва меҳнат муносабатлари вазири, Тошкент шаҳрининг Мирзо Улуғбек тумани ҳокими ва бошқа лавозимларда ишлаб келган.