Франциянинг 101 та департаментидан 78 тасида қурғоқчилик ва ерости сувларининг камайиши хавфи туфайли сувдан фойдаланишда чекловлар жорий этилди, дейилади ҳукуматнинг VigiEau интерактив харитасидаги маълумотларида.
18 август ҳолатига кўра, мамлакатнинг аксарият қисмида маълум даражада чекловлар жорий этилган. Қирқта департаментга қурғоқчилик хавфининг “қизил” мақоми берилди, бу энг юқори хавф даражаси ҳисобланади.
Чекловлар сувдан оқилона фойдаланишга ўтишга қаратилган. Эндиликда спорт майдончаларида майсазорларни суғориш, сузиш ҳавзаларини тўлдириш, автомобилларни ювиш ва бошқа бир қатор ичимлик суви истеъмоли билан боғлиқ ҳолатлар тақиқланди.
Яқинда Франциянинг “Метео-Франс” миллий метеорология хизмати пойтахтнинг 19 та департаментида жазирама туфайли табиий хавф даражасини оширди, яна 21 та департаментда ўртача — “сариқ” хавф даражаси белгиланган.
Изоҳ (0)