Жорий йилнинг биринчи ярим йиллигида кам фоизли кредитлар ажратиш бўйича Халқ банки етакчилик қилган. Банк январь июнь ойларида 2022 йилнинг мос даврига нисбатан 774,8 млрд сўм кўпроқ ипотерка кредитлари берган.
Фото: “Дарё” / Мадина Нурман
Ўзбекистонда 2020 йилдаги президент қарори билан уй-жой шароитини яхшилашга муҳтож аҳолини қўллаб-қувватлаш ва ипотека кредити бозорини янада ривожлантириш мақсадида “янги тартиб” дастури жорий қилинганди. Марказий банкнинг навбатдаги “Ипотека кредитлари шарҳи”да 2023 йилнинг январь июнь ойлари мобайнида мазкур дастур доирасида ажратилган ипотека кредитлари ҳақида маълумот берилди. Қайд этилишича, ўтган ярим йил ичида 14 582 нафар фуқарога жами 3 трлн 205 млрд 900 млн сўм миқдоридаги ипотека кредитлари ажратилган.
Ипотека кредитларининг 1 трлн 771 млрд 900 млн сўми (55 фоизи) 1 ва 2 хонали квартира, 1 трлн 3 млрд 600 млн сўми (32 фоизи) 3 ва ундан кўп хонали квартираларни, 430,4 млрд сўми (13 фоизи) якка тартибдаги уй-жойларни қуриш учун берилган.
“Янги тартиб” доирасида ажратилган ипотека кредитларининг энг юқори улушлари Тошкент шаҳри (753 млрд сўм), Самарқанд вилояти (321 млрд сўм), Фарғона вилояти (260 млрд сўм) ҳамда Андижон вилоятида (254 млрд сўм) истиқомат қилувчи фуқароларга ажратилган.
Ипотека кредитларининг 32,7 фоизи Халқ банки, (ўтган йилнинг мос даврига нисбатан 774,8 млрд сўмга кўп), 16,6 фоизи Ипотека банк (-359 млрд сўм), 13,3 фоизи Ўзсаноатқурилишбанк (+339,9 млрд сўм), 11,5 фоизи Ориент финанс банк (+101,3 млрд сўм) томонидан берилган. Қишлоқ қурилиш банк (-642,8 млрд сўм), Миллий банк (-388,8 млрд сўм) ва Ҳамкорбанкнинг (-95,6 млрд сўм) “Янги тартиб” доирасида ажратилган ипотека кредитларидаги улуши cезиларли даражада камайган.
2020-2022 йиллар ва 2023 йилнинг I ярим йиллигида “Янги тартиб” доирасида ажратилган ипотека кредитлари сонининг (82 529 нафар фуқарога 18,3 трлн сўм) 38 фоизи (31 522 нафар фуқарога 7,4 трлн сўм) уй-жой шароитларини яхшилашга муҳтож субсидия хабарномасига эга фуқароларга ажратилган. Ҳудудлар кесимида таҳлил қилинганда, мазкур кредитларнинг 1 трлн 419 млрд 700 млн сўми Самарқанд, 903 млрд сўми Сурхондарё вилоятлари, 803,9 млрд сўми Тошкент шаҳри, 795,7 млрд сўми Фарғона вилоятида истиқомат қилувчи уй-жой шароитларини яхшилашга муҳтож субсидия хабарномасига эга фуқаролар ҳиссасига тўғри келади.
2023 йил I ярим йиллигида “Янги тартиб” доирасида ажратилган ипотека кредитларининг 842,3 млрд сўми (23,3 фоизи) субсидия хабарномасига эга фуқароларга йўналтирилган. Субсидияли кредитларнинг 85 млрд сўми Тошкент шаҳри, 151 млрд сўми Самарқанд, 75 млрд сўми Тошкент ва 68 млрд сўми Андижон вилоятларида истиқомат қилувчи кам даромадли ижтимоий ҳимояга муҳтож фуқароларга ажратилган.
Изоҳ (0)