Qarshi davlat universitetida talabalarni yotoqxona bilan taʼminlash bo‘yicha onlayn tizim ishga tushirildi. Bu haqda “Daryo”ga universitet axborot xizmati rahbari Oybek Yusupov xabar berdi.
Taʼkidlanishicha, universitetda yangi o‘quv yiliga tayyorgarlik amalga oshirilmoqda.
“Xususan, oliy taʼlim muassasasida talabalarni turar joy bilan taʼminlash bo‘yicha alohida shtab tuzilib, ijara xonadonlarining kuz-qish mavsumiga tayyorgarligi, talabalarning dars qilishlari, dam olishlari uchun yaratilgan sharoitlar, ijaraga qo‘yuvchi oilaning ijtimoiy-maʼnaviy ahvoli o‘rganilmoqda. O‘rganishlar davomida xonadon egalariga ijara shartnomasi tuzish tartibi, uning afzalliklari haqida batafsil tushuncha berilmoqda”, — deydi Oybek Yusupov.
Shuningdek, universitetning mavjud talabalar turar joylari ham talabalarni kutib olish uchun shay holatga keltirilgan.
“Yaqinda oliygoh tomonidan talabalar uchun munosib sharoit va qulaylik yaratish maqsadida o‘ziga xos yangilikka qo‘l urildi. Endilikda universitet yoshlari talabalar turar joylariga joylashish uchun onlayn shaklda ariza topshirishlari mumkin”, — deydi masʼul.
Talabalarni turar joy bilan taʼminlash ishlarini muvofiqlashtirish bo‘limi boshlig‘i Umidjon Xolmurodovning qo‘shimcha qilishicha, onlayn platforma orqali talabalarga yotoqxona olish uchun arizalarni onlayn yuborish, tasdiqlash va rad etish jarayonini kuzatish imkoniyati yaratilgan.
“Talabalarni turar joy bilan taʼminlash jarayonining raqamlashtirilganligi, yoshlarning vaqt sarflamasdan, ortiqcha ovoragarchilik va qog‘ozbozliksiz, tez hamda oson yotoqxonaga joylashish imkoniyatini yaratadi. Ushbu yangi onlayn platformaning afzallik jihatlari shundaki, unda talaba yotoqxona olish uchun arizalarni onlayn yuborish, tasdiqlash va rad etish jarayonini kuzatib borishi hamda SMS xabarnomalar olishi mumkin. Shuningdek, yotoqxonalarga ijtimoiy himoyaga muhtoj talabalarni joylashtirish, shaffoflikni taʼminlash maqsadida to‘lovlarni onlayn shaklda amalga oshirish va fakultetlar uchun ajratilgan bo‘sh joylarni onlayn ko‘rish kabi qator qulayliklar mavjud”, — deydi Talabalarni turar joy bilan taʼminlash ishlarini muvofiqlashtirish bo‘limi boshlig‘i Umidjon Xolmurodov.
Izoh (0)