Жиззах вилояти Шароф Рашидов туманида фермер хўжалиги электр энергиясидан ноқонуний равишда фойдаланиб келгани аниқланди, деб хабар беради Энергетика вазирлиги матбуот хизмати.
Қайд этилишича, “Ўзэнергоинспекция” томонидан ҳуқуқни муҳофаза қилувчи органлар ва “Ҳудудий электр тармоқлари” АЖ билан ҳамкорликда Жиззах вилоятида назорат тадбирлари ўтказилган. Тадбирлар давомида Шароф Рашидов тумани “Янги диёр” МФЙда жойлашган “М.С.” фермер хўжалигида электр энергиясидан ноқонуний фойдаланиш ҳолати аниқланган.
Ушбу фермер хўжалиги электр қурилмаларини электр ҳисоблагичсиз тармоққа улаб, 223 минг кВт/соат электр энергиясидан ноқонуний фойдаланиб келгани ва бунинг натижасида таъминот корхонасига 100,4 миллион сўм миқдорида зарар келтиргани маълум бўлган.
Аниқланган ҳолат юзасидан расмийлаштирилган ҳужжатлар белгиланган тартибда ҳуқуқни муҳофаза этувчи органларга тақдим қилинган.
“Ўзэнергоинспекция” берган маълумотларга кўра, июль ойида 573 та ҳолатда истеъмолчилар томонидан табиий газ ва электр энергиясидан ноқонуний фойдаланиш ҳолатлари аниқланди. Ноқонуний фойдаланишнинг энг кўп ҳолатлари Андижон, Самарқанд, Навоий ва Тошкент вилоятлари ҳиссасига тўғри келади.
Изоҳ (0)