Fitch Ratings агентлиги Ўзбекистон президенти Шавкат Мирзиёев бошқарувида мамлакат иқтисодиётида ижобий ўсишлар кузатилганини қайд этди.
Агентликка кўра, Мирзиёев бошқарувини узайтириш институтларнинг бошқарув сифати ва мустақиллигига таъсир кўрсатишини вақт ўтиши билан кўриш мумкин. Ўзбекистон Жаҳон банкинининг бутунжаҳон бошқарув индикаторининг (WGI) 2021 йилги рейтингида 9 фоизга яхшиланиб, умумий 29 фоизга ошди. Корпоратив бошқарув стандартларини янада такомиллаштириш ва сиёсий хатарларни юмшатиш рейтингга ижобий таъсир кўрсатувчи омиллардир.
WGI ҳозирча Россиянинг Украинага бостириб кириши ёки Қорақалпоғистондаги тартибсизликлар билан боғлиқ геосиёсий ўзгаришларни қайд этмайди.
Агентлик сўнгги ойларда ҳукумат жамоатчиликнинг бошқарувга нисбатан муносабатига кўпроқ реакция билдирганини алоҳида қайд этади.
“Январь ойида Мирзиёев Тошкент ҳокимини электр қуввати тақчиллигидан кенг жамоатчиликнинг норозилиги туфайли ишдан бўшатганди. Ҳозирги вақтда Вазирлар Маҳкамаси ҳажмини қисқартириш ва лавозимга кўтарилиш учун самарадорлик билан боғлиқ стандартларни амалга оширишда кучли импулс мавжуд”, — дейилади хабарда.
WGI рейтингидаги 2021 йилги сакрашга, хусусан, тартибга солиш сифати индекси (+17 фоиз) ва ҳукумат самарадорлиги индекси (+11 фоиз даража) сабаб бўлди. Ҳукумат бозор механизмларини жорий этишга ва давлатнинг иқтисодиётдаги катта қисмини қисқартиришга интилиб, институционал сифатни яхшилашга ҳаракат қилмоқда.
2023 йил ўрталарида энергия тарифларини либераллаштириш режалари кейинги ислоҳотларга бўлган қадамнинг дастлабки белгиси бўлиши мумкин.
Иқтисодий кун тартибига, шунингдек, давлат корхоналарини хусусийлаштириш (Ипотека-банкнинг назорат пакети июнь ойида Венгриянинг OTP банкига сотилган); муҳим мақсадли хорижий инвестицияларни жалб қилиш; инфляцияни назорат қилишга кўмаклашиш мақсадида Молия вазирлиги ва Марказий банк ўртасидаги сиёсатни мувофиқлаштиришни такомиллаштириш; 2023—2026 йилларда энергетика, транспорт ва ижтимоий инфратузилмада давлат-хусусий шерикликни 13,4 млрд долларга ривожлантириш киради.
“Биз реал ялпи ички маҳсулот ўсиши 2023 йилда 4,7 фоизда мустаҳкам қолиши, 2024 йилда 6 фоизга ва 2025 йилда 5,8 фоизга кўтарилишини прогноз қиламиз, бу кучли инвестициялар ўсиши, Россиядан пул ўтказмаларининг давом этиши ва инфляциянинг пасайиши билан қўллаб-қувватланади. ЯИМ ўсиши ва макроиқтисодий барқарорликни таъминловчи таркибий ислоҳотларнинг изчил амалга оширилиши иккинчи ижобий кўрсаткичдир”, — дейди таҳлилчилар.
Улар иқтисодиёт Украина уруши ва Россия санкциялари оқибатларига чидамлилигини исботлагани, аммо бу хавфлар қандай ривожланиши ҳали ҳам номаълум эканини таъкидлади.
“Россия билан тижорий алоқалар чуқур сақланиб қолади ва ишонамизки, президент Мирзиёев ҳукумати Россияга қарши санкцияларга дуч келмаслик учун буни Ғарб давлатлари билан мустаҳкам алоқалар билан мувозанатлашда давом этади”, — дея хулоса қилади таҳлилчилар.
Изоҳ (0)