Ghibli Хаяо Миязаки анимеларидан илҳомланиб яратилган атирни тақдим этди (фото)

Аниме мавзуси ҳақида гап кетганда Хаяо Миязаки ижодига назар ташламасликнинг иложи йўқ: у анимеларидаги ранглар уйғунлиги, нозик дид билан танланган мусиқа, сеҳрли олами билан бутун дунёга танилган буюк режиссёрдир. У яқинда янги ижод маҳсулини мухлисларига тақдим этишини маълум қилди, Гэнзабуро Ёсинонинг “Қандайсан?” китоби асосида суратга олинган анимация карикатурачининг сўнгги асари бўлади. 

Қарийб қирқ йил олдин Миязаки томонидан асос солинган Ghibli ва парфюмерия ишлаб чиқарувчи Fernanda атир маҳсулотлари сериясини йўлга қўйди. Атирлар уч хил ҳидга эга. Ишлаб чиқарувчилар атирни “Кики — етказиб бериш хизмати”, “Юрадиган қалъа” ва “Юрак шивири” каби студиянинг машҳур лойиҳаларидан илҳомланиб яратган.

Ҳар бир ҳид фойдаланувчини севимли анимеларидан бири билан боғлиқ хотираларга қайтаради. Биринчи атирдан юзу, амбер ва қора чойнинг ифори келади, бу эса Сидзуку ва Сэидзи тарихини эслатади. Жасмин, нок ва нилуфар гулининг хушбўй ҳиди Кики жодугарининг дўконини ёдга солади. Учинчи атирда қарағай меваси, лили ва атиргуллар аралашмасининг ифори бор, у эса фойдаланувчига ўзини Ҳаул болалигини ўтказган боғнинг меҳмони каби ҳис қилиш имконини беради.

Ҳозирча атирни фақат Япониядан сотиб олишингиз мумкин, бироқ ҳар куни улар бошқа мамлакатларга юборилмоқда. Атирнинг нархи тахминан 15 долларни ташкил қилади.