Россия Тергов қўмитаси 35 кишининг ҳаётига зомин бўлган Махачқалъадаги портлаш тез ёнувчи агрокимёвий моддаларни сақлаш қоидалари бузилгани сабаб содир бўлган бўлиши мумкинлигини билдирди.
Тергов маълумотларига кўра, ёнғин автосервисда бошланган, шундан сўнг у ёнувчи ўғит сақланган қўшни хонага ўтган. Кейин кучли портлаш содир бўлган ва аланга яқин атрофдаги ёқилғи қуйиш шохобчасига тарқалган.
“РБК” мухбири портлаш жойида қишлоқ хўжалигида ўғит сифатида ишлатиладиган аммиакли селитра қоплари топилганини маълум қилди.
Аввалроқ Маsh Telegram канали маҳаллий аҳолига таяниб, портлаш селитра омборида юз берганини ёзганди.
Доғистон раҳбари Сергей Меликовнинг айтишича, портлашга хавфсизлик чораларига эътибор бермаган одамларнинг “тамагирлиги ва очкўзлиги” сабаб бўлган. Ёқилғи қуйиш шохобчаси яқинида хизмат кўрсатиш станциясини жойлаштириш мумкин эмас.
Махачқалъада портлаш: Ўзбекистон фуқароси ҳам ҳалок бўлди
Махачқалъадаги портлаш 14 август куни кечқурун содир бўлди. Оқибатда 35 киши ҳалок бўлди, 80 га яқин одам яраланди. Қурбонлар орасида Ўзбекистон фуқароси ҳам борлиги айтилмоқда.
Россия Тергов қўмитаси томонидан икки ёки ундан ортиқ кишининг ўлимига сабаб бўлган хавфсизлик талабларига жавоб бермайдиган хизматлар кўрсатиш моддаси бўйича жиноят иши қўзғатилган. Доғистонда мотам эълон қилинди.
Изоҳ (0)