Тошкент вилояти Қибрай туманида онасининг Spark машинасида ЙТҲга учраган йигит ҳалок бўлди, деб хабар беради вилоят ИИББ ЙҲХБ ахборот хизмати.
Маълум қилинишича, 11 август куни соат таxминан 15:00 ларда Қибрай тумани ҳудудидан ўтган 4Р6 Тошкент—Чирчик—Чимён автомобиль йўлининг 10-километрида 18 ёшли М.З. (ҳайдовчилик гувоҳномасига эга эмас) онасига тегишли бўлган Spark русумли транспорт воситасини бошқарган. У Тошкент—Чирчиқ йўналишида ҳаракатланиб кетаётган вақтида йўлнинг хавфли бурилиш қисмида (огоҳлантирувчи йўл белгилари мавжуд) рул бошқарувини йўқотган ва йўл четидаги дарахтга урилиб, йўл-транспорт ҳодисасини содир этган.
ЙТҲ оқибатида ҳайдовчи олган тан жароҳатлари туфайли воқеа жойида вафот этган. Шунингдек, автомобилнинг олд ўриндиғида бўлган 18 ёшли йўловчи туман марказий шифохонасига ётқизилган.
Мазкур ЙТҲ юзасидан Қибрай тумани ИИБ ходимлари томонидан терговга қадар суриштирув ҳаракатлари олиб борилмоқда.
Охирги вақтларда содир бўлган ЙТҲлар
Бундан олдин Тошкентнинг Учтепа туманида учта машина иштирокида йўл-транспорт ҳодисаси содир бўлгани, Самарқандда йигит тоғасининг машинасини олиб қочиб, 4 та автомобиль билан тўқнашгани, Ўзбекистон парламенти қуйи палатаси ёнидаги пиёдалар ўтиш жойида Damas аёлни уриб юборгани тўғрисида хабар берилганди. Шунингдек, бир неча кун олдин Malibu-2 русумли автомашинани бошқариб кетаётган ҳайдовчи, йўлнинг белгиланмаган қисмидан кесиб ўтаётган пиёда — 74 ёшли М.Ҳ.ни уриб юборганди.
Изоҳ (0)