Тошкент—Самарқанд автомобиль йўлида Nexia-2 русумли транспорт воситаси иккита юк машинаси орасида қолиб кетди. Бу ҳақда “Марказий студия” информацион дастурида маълум қилинди.
Қайд этилишича, 20 июль куни соат 18:00 ларда Сирдарё туманидаги “Деҳқонобод” МФЙдан ўтган М34 автомобиль йўлида Nexia-2, “Зил” ва Howo юк машиналари иштирокида ЙТҲ содир бўлган. “Зил” светофорнинг қизил чироғида тўхтаб турган вақтида Spark русумли машина эгаси бошқарувни йўқотиб, юк машинасининг орқа қисмига келиб урилган.
Spark ортидан келаётган кулранг Nexia-2 ҳам енгил машинага урилган ва Spark’ни йўлнинг қатнов қисмидан чиқариб ташлаган. “Зил” ортида тўхтаб қолган Nexia-2’нинг ортидан келаётган Howo тўхташга улгурмаган ва кулранг транспорт воситаси икки юк машинасининг орасида қолиб кетган.
ЙТҲ оқибатида Nexia-2 ҳайдовчиси ва йўловчиси воқеа жойида вафот этган, Spark йўловчиси эса Сирдарё тумани тиббиёт бирлашмасига ётқизилган.
Маълум қилинишича, 20 июлнинг ўзида республика бўйлаб 6 та ЙТҲ юз берган. Ҳалокатлар оқибатида уч киши вафот этган ва яна уч киши жароҳат олган.
Бундан олдин Тошкентнинг Учтепа туманида учта машина иштирокида йўл-транспорт ҳодисаси содир бўлгани, Самарқандда йигит тоғасининг машинасини олиб қочиб, 4 та автомобиль билан тўқнашгани, Ўзбекистон парламенти қуйи палатаси ёнидаги пиёдалар ўтиш жойида Damas аёлни уриб юборгани тўғрисида хабар берилганди.
Изоҳ (0)