Тармоқларда Андижон вилоятининг Асака туманидаги 54-умумтаълим мактаби ўқитувчилари таътил вақтида дам олиш ўрнига ўзлари учун ҳашар йўли билан қўшимча бино қураётгани айтилган хабарлар тарқалганди. “Дарё” мухбири мазкур мурожаатни ўрганиб, ўқитувчилар ҳамда мактабгача ва мактаб таълими бўлими раҳбари фикрларини эшитганди.
Ўрганиш давомида мактаб ўқитувчилари муассасада нафақат қўшимча бинога, ўқитувчилар хонасига ҳам эҳтиёж борлигини, шу сабабли жамоа келишиб қурилиш ишларини бошлаб юборганлигини айтишган. Шунингдек, улар ҳокимият вакиллари эътиборсизлигидан ҳафсаласи пир бўлганини билдириб, президентдан муаммони ҳал қилишда ёрдам сўраган. Асака туман мактабгача ва мактаб таълими бўлими бошлиғи Турсуной Газибаева мактаб бундан анча йиллар аввал қайсидир дастурга тушган, бироқ турли сабабларга кўра бошланган ишлар тўхтаб қолганини қайд этганди.
Масъуллар маълумоти қанчалик ҳақиқатга яқинлигини ўрганиш мақсадида “Дарё” мухбири қўшимча ўрганиш олиб борди.
Ўрганишлар давомида “Адолат” газетасининг 2017 йил май ойидаги 19-сонида “Мулоқотлар ўз самарасини бермоқда” сарлавҳали материал эълон қилингани, унда Халқ депутатлари Асака туман Кенгашидаги “Адолат” СДП депутатлик гуруҳи аъзоси, туман партия кенгаши раиси Меҳринисо Каримова 54-умумтаълим мактаби жамоаси спорт зали йўқлигидан қийналаётганини баён этгани, ушбу мурожаат юзасидан депутатларнинг туман ҳокимлигига билдирган таклифи эътиборсиз қолмагани қайд этилган. Шунингдек, мактаб учун Болалар спортини ривожлантириш жамғармаси томонидан 750 миллион сўм маблағ ажратилиб, қурилиш ишлари бошланганлиги таъкидланган.
Бироқ бошланган иш жамғарманинг тугатилганлиги ҳамда бошқа турли сабаблар рўкач қилиниб, якунига етказилмаган. Орадан олти йил вақт ўтган бўлса-да депутатлар ушбу дастур ижросини назорат қилмаган.
Биз Меҳринисо Каримова билан боғланишга ҳаракат қилдик, бироқ бунинг имкони бўлмади.
Ўрганишлар давомида яна бир муҳим ҳужжат, Вазирлар Маҳкамасининг 2021 йил 15 ноябрдаги “2021—2023 йилларда Андижон вилоятининг Асака туманини комплекс ижтимоий-иқтисодий ривожлантириш чора-тадбирлари тўғриси”даги қарори эътиборимизни тортди. Аниқланишича, мактаб 2021—2023 йилларда Асака туманида ижтимоий соҳа объектларининг моддий-техника базасини мустаҳкамлаш ҳамда қурилиш-таъмирлаш тадбирларининг манзилли рўйхатига киритилган бўлиб, унга кўра муассасада 2023 йил давомида жорий таъмирлаш ишлари амалга ошириш белгиланган. Ушбу таъмирлаш ишлари учун маҳаллий бюджет маблағлари ҳисобидан 500 миллион сўм ажратилиши кўзда тутилган. Масъул ижрочилар сифатида эса вилоят ҳамда туман ҳокимлиги кўрсатиб ўтилган. Бироқ шу кунга қадар ҳеч қандай амалий ишлар бажарилмаган.
“Дарё” мухбири мазкур материални тайёрлашдан олдин Асака тумани ҳокимининг ёшлар масалалари бўйича ўринбосари Шоҳрух Султонов билан телефон орқали суҳбатлашган. Бироқ у юқоридаги муаммо юзасидан ҳокимликка ҳар йили таклиф келиб тушгани, бу лойиҳа молиялаштиришга ҳам берилгани, аммо ишлар охирига етказилмай, қолиб кетганини таъкидлаган. Қайси дастурга тушганлигини эса аниқ айтилмаган.
“Мактабга қўшимча бино қуриб, қайта таъмирлаш юзасидан туман ҳокимлиги томонидан ҳар йили таклифлар берилган. Бироқ аниқ бир дастурга тушмаган. Мактаб жамоасининг айтишича, қайсидир йилда таклиф молиялаштиришга берилиб, шу билан қолиб кетган экан”, — деганди Шоҳрух Султонов.
Бизни қизиқтирган саволлар шуки, туман ҳокимлиги Вазирлар Маҳкамаси томонидан қабул қилинган юқоридаги қарор билан танишиб чиққанмикан? Вилоят ҳокимлигичи? Ҳали якунланмаган чора-тадбирлар дастурида белгиланган вазифалар ижроси нима бўляпти? Дастурга тушган қурилиши ҳамда таъмирланиши белгиланган қолган ижтимоий соҳа объектларининг ҳолати қандай? Наҳотки қарор ижроси қандай кетаётганлиги бўйича ҳеч қандай назорат ишлари амалга оширилмаган бўлса?
Саволлар кўп, аммо жавоблар етарли эмас.
Изоҳ (0)