Ўтган йили мамлакат бюджетидан табиий газ нархларидаги тафовутни қоплаш билан боғлиқ харажатлар учун қарийб 6,7 триллион сўм харажат йўналтирилган. Бу ҳақда Иқтисодиёт ва молия вазирлиги эълон қилган “Фуқаролар учун бюджет” нашрида қайд этилган.
Маълум қилинишича, табиий газ олди-сотдиси нархларидаги кескин фарқ иқтисодиётга йўналтирилган харажатлар ошишига сабаблардан бири бўлган.
“Иқтисодиётга амалга оширилган харажатларнинг ошиши қишлоқ хўжалигини давлат томонидан қўллаб-қувватлаш жамғармасига 4,5 триллион сўм миқдорида беғараз молиявий ёрдам кўрсатилиши ҳамда UzGasTrade АЖ томонидан табиий газни сотиб олиш ва сотиш ўртасида юзага келган зарарни қоплаш учун 6,7 триллион сўм миқдорида харажатларнинг амалга оширилиши билан боғлиқ”, — дейилади вазирлик ахборотида.
Ўзбекистонда табиий газ ва электр энергияси тарифлари аҳоли ва юридик шахслар учун 2019 йилдан бери ўзгармай келмоқда. Шунинг учун бюджет харажатларининг бир қисми табиий газ нархидаги тафовутни қоплашга кетади. Бир куб метр газни қазиб олиш нархи 550 сўм бўлса, аҳолига сотилаётган нарх 380 сўмдан тўғри келади.
Аввалроқ собиқ молия вазири ўринбосари Дилшод Султонов 2023 йилда жалб қилинадиган давлат қарзларининг 14,5 триллион сўми табиий газ субсидиясига сарфланишини айтганди.
“Ташқи қарзнинг 3 миллиард доллардан ортиқ қисми бюджетни қўллаб-қувватлашга сарфланади. Масалан, бу йилги иккита йирик харажатдан бири ҳисобланган табиий газ нархи учун бериладиган субсидияга 14,5 триллион сўм сарфлаш белгиланган”, — деган у.
Маълумот учун, 2023 йилда Ўзбекистон номидан ва республика кафолати остида ташқи қарзни жалб қилиш бўйича йиллик имзоланадиган янги битимларнинг чекланган ҳажми 4,5 миллиард АҚШ доллари этиб белгиланган. Шундан давлат бюджетини қўллаб-қувватлаш учун 2 миллиард доллар, инвестиция лойиҳаларини молиялаштиришга 2,5 миллиард доллар йўналтириш режалаштирилган.
“Давлат бюджети тўғрисида”ги қонунга асосан, жорий йилда 19,2 триллион сўм маблағлар давлат қарзининг асосий қисмини тўлашга сарфланади.
Изоҳ (0)