Tarmoqlarda Andijon viloyatining Asaka tumanidagi 54-umumtaʼlim maktabi o‘qituvchilari taʼtil vaqtida dam olish o‘rniga o‘zlari uchun hashar yo‘li bilan qo‘shimcha bino qurayotgani aytilgan xabarlar tarqalgandi. “Daryo” muxbiri mazkur murojaatni o‘rganib, o‘qituvchilar hamda maktabgacha va maktab taʼlimi bo‘limi rahbari fikrlarini eshitgandi.
O‘rganish davomida maktab o‘qituvchilari muassasada nafaqat qo‘shimcha binoga, o‘qituvchilar xonasiga ham ehtiyoj borligini, shu sababli jamoa kelishib qurilish ishlarini boshlab yuborganligini aytishgan. Shuningdek, ular hokimiyat vakillari eʼtiborsizligidan hafsalasi pir bo‘lganini bildirib, prezidentdan muammoni hal qilishda yordam so‘ragan. Asaka tuman maktabgacha va maktab taʼlimi bo‘limi boshlig‘i Tursunoy Gazibayeva maktab bundan ancha yillar avval qaysidir dasturga tushgan, biroq turli sabablarga ko‘ra boshlangan ishlar to‘xtab qolganini qayd etgandi.
Masʼullar maʼlumoti qanchalik haqiqatga yaqinligini o‘rganish maqsadida “Daryo” muxbiri qo‘shimcha o‘rganish olib bordi.
O‘rganishlar davomida “Adolat” gazetasining 2017-yil may oyidagi 19-sonida “Muloqotlar o‘z samarasini bermoqda” sarlavhali material eʼlon qilingani, unda Xalq deputatlari Asaka tuman Kengashidagi “Adolat” SDP deputatlik guruhi aʼzosi, tuman partiya kengashi raisi Mehriniso Karimova 54-umumtaʼlim maktabi jamoasi sport zali yo‘qligidan qiynalayotganini bayon etgani, ushbu murojaat yuzasidan deputatlarning tuman hokimligiga bildirgan taklifi eʼtiborsiz qolmagani qayd etilgan. Shuningdek, maktab uchun Bolalar sportini rivojlantirish jamg‘armasi tomonidan 750 million so‘m mablag‘ ajratilib, qurilish ishlari boshlanganligi taʼkidlangan.
Biroq boshlangan ish jamg‘armaning tugatilganligi hamda boshqa turli sabablar ro‘kach qilinib, yakuniga yetkazilmagan. Oradan olti yil vaqt o‘tgan bo‘lsa-da deputatlar ushbu dastur ijrosini nazorat qilmagan.
Biz Mehriniso Karimova bilan bog‘lanishga harakat qildik, biroq buning imkoni bo‘lmadi.
O‘rganishlar davomida yana bir muhim hujjat, Vazirlar Mahkamasining 2021-yil 15-noyabrdagi “2021—2023-yillarda Andijon viloyatining Asaka tumanini kompleks ijtimoiy-iqtisodiy rivojlantirish chora-tadbirlari to‘g‘risi”dagi qarori eʼtiborimizni tortdi. Aniqlanishicha, maktab 2021—2023-yillarda Asaka tumanida ijtimoiy soha obyektlarining moddiy-texnika bazasini mustahkamlash hamda qurilish-taʼmirlash tadbirlarining manzilli ro‘yxatiga kiritilgan bo‘lib, unga ko‘ra muassasada 2023-yil davomida joriy taʼmirlash ishlari amalga oshirish belgilangan. Ushbu taʼmirlash ishlari uchun mahalliy budjet mablag‘lari hisobidan 500 million so‘m ajratilishi ko‘zda tutilgan. Masʼul ijrochilar sifatida esa viloyat hamda tuman hokimligi ko‘rsatib o‘tilgan. Biroq shu kunga qadar hech qanday amaliy ishlar bajarilmagan.
“Daryo” muxbiri mazkur materialni tayyorlashdan oldin Asaka tumani hokimining yoshlar masalalari bo‘yicha o‘rinbosari Shohrux Sultonov bilan telefon orqali suhbatlashgan. Biroq u yuqoridagi muammo yuzasidan hokimlikka har yili taklif kelib tushgani, bu loyiha moliyalashtirishga ham berilgani, ammo ishlar oxiriga yetkazilmay, qolib ketganini taʼkidlagan. Qaysi dasturga tushganligini esa aniq aytilmagan.
“Maktabga qo‘shimcha bino qurib, qayta taʼmirlash yuzasidan tuman hokimligi tomonidan har yili takliflar berilgan. Biroq aniq bir dasturga tushmagan. Maktab jamoasining aytishicha, qaysidir yilda taklif moliyalashtirishga berilib, shu bilan qolib ketgan ekan”, — degandi Shohrux Sultonov.
Bizni qiziqtirgan savollar shuki, tuman hokimligi Vazirlar Mahkamasi tomonidan qabul qilingan yuqoridagi qaror bilan tanishib chiqqanmikan? Viloyat hokimligichi? Hali yakunlanmagan chora-tadbirlar dasturida belgilangan vazifalar ijrosi nima bo‘lyapti? Dasturga tushgan qurilishi hamda taʼmirlanishi belgilangan qolgan ijtimoiy soha obyektlarining holati qanday? Nahotki qaror ijrosi qanday ketayotganligi bo‘yicha hech qanday nazorat ishlari amalga oshirilmagan bo‘lsa?
Savollar ko‘p, ammo javoblar yetarli emas.
Izoh (0)