Ўзбекистонда қўлбола усулда тайёрланган алкогол маҳсулотларининг ноқонуний савдосига чек қўйиш ва бу билан шуғулланувчи яширин цехларни фош этиш борасида тезкор тадбирлар амалга оширилмоқда, деб хабар беради Давлат божхона қўмитаси.
Жумладан, Хоразм вилояти божхона бошқармаси Контрабандага қарши курашиш шўбаси ходимлари томонидан олдиндан олинган тезкор маълумотга асосан, вилоят Давлат хавфсизлик хизмати ва Ички ишлар бошқармаси ходимлари билан ҳамкорликда Гурлан туманида тезкор тадбир ўтказилган.
Натижада фуқаро Д.Б.нинг яшаш уйида жами 51,5 литр спирт маҳсулотлари, 61 дона “Qaratow”, 480 дона “Урганч шароб ЎзСТ” ёзувли қопқоқлар, 458 дона бир хил серия ва рақамли акциз маркалар, 695 дона маҳсулотларни қадоқлашда ишлатиладиган оқ ва яшил рангли клёнкалар ҳамда 1 дона қадоқлашда фойдаланиладиган ускуна далилий ашё сифатида олинган.
Ўтказилган суриштирувлар бўйича олинган хулосаларга кўра, 480 дона акциз маркалар компьютернинг рангли принтерида тайёрлангани аниқланган.
Шунингдек, 51,5 литр спирт маҳсулотлари истеъмолга яроқсиз, давлат стандарти талабларига жавоб бермайдиган, истеъмолчилар ҳаёти ва соғлиғи учун хавфли экани маълум бўлган.
Мазкур ҳолат юзасидан фуқаро Д.Б.га нисбатан Жиноят кодексининг тегишли моддалари билан жиноят иши қўзғатилган.
Апрель ойида президентнинг “Аҳолини сифатли истеъмол товарлари билан таъминлашга қаратилган қўшимча чора-тадбирлар тўғрисида”ги қарори имзоланганди. Унда алкогол ва тамаки маҳсулотларининг ноқонуний муомаласи билан боғлиқ қилмиш учун жавобгарликни кучайтириш ҳамда жамоатчилик назоратини таъминлаш кўзда тутилган.
Изоҳ (0)