АҚШ расмийлари Украинани қанча керак бўлса, шунча қўллаб-қувватлай олишларига ишончлари комил, деди Пентагон матбуот котиби Патрик Райдер. Унинг сўзларига кўра, Вашингтон бу мавзуни Киев билан, шунингдек, иттифоқчилари билан муҳокама қилишда давом этади.
“Биз Украинани қанча керак бўлса, шунча қўллаб-қувватлай олишимизга ишончимиз комил”, — деди Райдер брифингда.
Унинг қўшимча қилишича, “Қўшма Штатлар 6,2 миллиард доллар миқдоридаги пулни ўз зиммасига олган мажбуриятларни бажаришга ишлата олади. Ушбу маблағлар биз учун жорий молиявий йил охирида ва кейинги молиявий йилда мавжуд бўлади. Шунингдек, бюджет доирасида ажратиладиган қарийб 600 миллион доллар ҳам бор”, — деди матбуот котиби.
Россия Украина билан уруш бошлаганидан бери АҚШ украинларга 113 миллиард доллардан ортиқ ёрдам ажратишни маъқуллади.
10 август куни АҚШ президенти Жо Байден шу мақсадда Конгрессдан қўшимча 13 миллиард доллар сўради. Шу ой, Украина расмийлари ҳам хавфсизлик кафолатларини олиш учун АҚШ билан музокараларни бошлади.
Изоҳ (0)