10 август куни кечқурун Запорожье шаҳрига ракета ҳужуми оқибатида бир киши ҳалок бўлди, 16 киши, жумладан, тўрт нафар бола жароҳатланди. Бу ҳақда Запорожье вилояти ҳарбий маъмурияти раҳбари Юрий Малашко маълум қилди.
Унга кўра, Россия қўшинлари фуқаролик инфратузилмаси объектига зарба берган. Айнан қандай объект экани айтилмаган, аммо бинодаги ёзувга кўра, бу Реикартз меҳмонхонаси, деб хабар қилди BBC рус хизмати.
Запорожьега “Искандер-К” ракеталари билан зарба берилди, деб ёзмоқда “Strana.ua” нашри Украина полициясига таяниб.
Украина президенти Владимир Зеленскийнинг сўзларига кўра, Запорожьега ракета ҳужумидан кейин ёнғин бошланган. Зеленский ҳам ҳужумда Россия қўшинларини айблади.
Бирлашган Миллатлар Ташкилотининг Украинадаги инсонпарварлик ёрдами координатори Денис Брауннинг айтишича, Запорожьедаги ўққа тутилган меҳмонхонадан БМТ ходимлари тез-тез фойдаланиб келарди.
Украинадаги урушни қўллаб-қувватловчи рус Telegram каналлари Россия қўшинлари Запорожьеда хорижий ёлланма аскарлар ва Украина Қуролли кучлари ҳарбийлари жойлашган жойга зарба бергани ҳақида хабар берди.
Россия Мудофаа вазирлиги ҳужумга изоҳ бермади.
Россиянинг Украина билан чегарадаги вилояти ўққа тутилди
10 август куни Россиянинг Брянск вилоятидаги Чауси қишлоғи ўққа тутилди. Оқибатда икки киши ҳалок бўлди, деб хабар бермоқда вилоят губернатори Александр Богомаз ижтимоий тармоқларда.
Унинг сўзларига кўра, Чауси қишлоғи Украина қўшинлари томонидан ўққа тутилган. Бир киши воқеа жойида вафот этган, кейинроқ иккинчисининг ўлими ҳақида маълум бўлган. Яна икки фуқаро — бир аёл ва бир эркак турли даражадаги тан жароҳатлари олган. Вилоят раҳбарининг айтишича, отишма оқибатида қишлоқ хўжалиги корхонасига зарар етган.
База нашри маълумотларига кўра, ферма ўққа тутилган, тўртта артиллерия снаряди тушган. 50 ёшли фермер хўжалиги раҳбари ва 55 ёшли ходим жароҳатлари туфайли шифохонада вафот этган. Telegram канали хабарига кўра, 44 ёшли фермер хўжалиги ходими реанимацияда, 48 ёшли ишчи эса жарроҳлик бўлимида.
Брянск вилояти, шунингдек, Украина билан чегарада жойлашган Россиянинг бошқа вилоятлари ҳукумати ҳар куни Украина томонидан ўққа тутилаётгани ҳақида хабар беради. Украина расмийлари Россия ҳудудига зарба бераётганини инкор этиб, улар ҳужум эмас, мудофаа урушини олиб бораётганини айтади.
Изоҳ (0)