Гавайи архипелагидаги Мауи туристик оролида ўрмон ёнғинлари 53 кишининг ҳаётига зомин бўлди, деб хабар бермоқда орол расмийлари.
Вайронагарчиликларнинг асосий қисми Мауи шимолидаги Лахайна шаҳрида кузатилди.
Оролда уч кундан бери ёнғин давом этмоқда. Губернатор Жош Гриннинг CNN телеканалига айтишича, қутқарувчилар ёниб кетган юзлаб биноларни кўздан кечираётганда қурбонлар сони аввалгидан (дастлаб 36 киши эди) “сезиларли даражада” кўп эканини аниқлаган. Унга кўра, 1 700 дан ортиқ уй вайрон бўлган.
Орол маъмуриятининг таъкидлашича, Лахайнадаги ёнғиннинг 80 фоизи ўраб олинган. Ёнғинни ўчириш бўйича ишлар олиб борилаётган вақтда шаҳарга кириш чекланган, бундан ташқари, шаҳар электр энергиясидан узилган. Бир кечада 1 050 киши ҳарбий музей ва жамоат марказига жойлаштирилган, яна 300 нафар аҳоли Мауи қироллик собори ва насронийлар черковида очилган фавқулодда эвакуация жойларида қолмоқда.
АҚШ президенти Жо Байден Гавайидаги ўрмон ёнғинлари фонида табиий офат оқибатларини бартараф этиш декларациясини имзолади. Декларацияга мувофиқ Мауи округидаги ёнғиндан жабрланганлар учун федерал бюджетдан пул ажратилади.
Оролда табиий ёнғинлар 8 август куни бошланган. Олов биноларни қамраб олган ва кучли шамол таъсирида бошқа уйларга тарқалган. Баъзи маҳаллий аҳоли вакиллари ёнғиндан қутулиш учун ўзини океанга ташлашга мажбур бўлган. Кўчаларни қалин тутун қоплагани сабаб аҳоли атрофни деярли кўра олмай, машиналарда шаҳарни тарк этган.
Изоҳ (0)