Қашқадарё вилоятининг Қарши туманида яшовчи фуқаро Spark автомобили ва 40 миллион сўм маблағи эвазига оғзаки келишув асосида Cobalt сотиб олиб, чув тушди. Айни кунда у Spark машинаси ва 40 миллион сўм пулидан ҳам ажралиб қолди. Бу ҳақда “Дарё”га шикоят қилган фуқаронинг айтишича, уни алдаб кетган фуқаро Spark ва 40 миллион сўм пул олганини тан олган. Бироқ “қўлингдан келганига қил”, дея қайтариб бермаслигини айтган.
“Мазкур масала юзасидан кўплаб ташкилотларга шикоят қилиб, алдаб кетишганини, ёрдам беришларини сўрадим. Аммо натижа йўқ”, — дейди вилоятнинг Қарши туманида яшовчи Шерзод Раҳматов.
Мурожаатчининг маълум қилишича, у 2022 йилнинг 7 июль куни Жамшид Улашов исмли фуқародан Cobalt автомобилини сотиб олган.
Жамшид Улашовнинг Cobalt машинасини сотиб олиб, ўрнига ўзимнинг Spark автомобилим ва 40 миллион сўм пул бердим. Ўша куни Қарши шаҳридаги 1-сонли нотариусга бориб, “генералний доверност” қилиб олдим. Нотариуслар менинг машинани сотиб олганимни билса-да, бу ҳам ҳужжат дейишди. Икки йил шу ҳужжат билан машинани ҳайдаб юраверасиз, дейишди. 2023 йилнинг 26 февраль куни машинанинг асл эгаси Раҳима Файзиева ушбу ҳужжатни бекор қилиш бўйича ариза берган экан. Шу сабаб Жамшид Улашов ҳамда ва икки нафар “ГАИ” ходими келиб, менинг машинамни тортиб олишди, — дейди муаммо ҳақида гапирган фуқаро.
Шерзод Раҳматовнинг айтишича, сотиб олган машинаси Қарши шаҳридаги бозор ҳудудида тортиб олинган.
Cobalt машинаси ўрнига мендан Spark ва 40 миллион сўм олган фуқаронинг бу ҳақда тилхати бор. У мендан Spark машина олганини, устига қўшимча яна 40 миллион сўм пул олганини ҳам ёзиб, тилхат берган. Бугунги кунга келиб, пулинг ва машинангни олдим, қайтариб ҳам бермайман, хоҳлаган жойингга бор, деяпти. Менга ҳеч қайси ташкилот ёрдам бермаяпти, — дейди мурожаатчи.
Қўшимча қилинишича, Жамшид Улашов томонидан Шерзод Раҳматовга сотилган Cobalt ҳужжатга кўра, Раҳима Файзиеваники бўлган.
Бу аёл машинасини дастлаб “генералний доверност” асосида Жамшид Улашовга сотган. Раҳима Файзиева тилхатида Жамшид Улашовдан Cobalt учун 74 миллион сўм пул олганини, Жамшид Улашовнинг машинани сотишига ҳам қарши эмаслигини ёзган. Шундан сўнг Жамшид Улашов машинани менга сотган. Мен ҳам, Жамшид Улашов ҳам машинани сотиб олганимизда олди-сотди шартнома қилмаганмиз. Шу сабабми, опа “ганералний доверност”ни 2022 йилнинг 28 декабрь куни бекор қилган экан, — дейди мурожаатчи.
Айни кунга келиб, пули ва машинасига куйиб қолаётганини айтган мурожаатчи муаммо юзасидан Қарши шаҳар, туман ҳамда вилоят прокуратурасига мурожаат қилганини, нотариуслар устидан Адлия бошқармасига шикоят киритганини, аммо натижаси йўқлигини айтмоқда.
Бу муаммони суд ҳам кўриб чиқди. Суд машина эгаси Файзиева бўлгани учун машина унга қайтарилиши кераклигини айтган. Лекин мендаги Файзиеванинг тилхати, Жамшид Улашовларнинг тилхатига эътибор қаратмаяпти. Жамшид Улашов эса опа билан ўзларинг келишиб олинглар, демоқда. Тилхатлар ҳам, ҳужжатлар ҳам ўтмаяпти, — дейди мурожаатчи.
“Дарё” воқеалар ривожини кузатишда давом этади.
Изоҳ (0)