Qashqadaryoda Spark va 40 mln so‘mga Cobalt sotib olgan fuqaro chuv tushdi. Sotilgan mashina boshqaniki bo‘lib chiqmoqda

Qashqadaryo viloyatining Qarshi tumanida yashovchi fuqaro Spark avtomobili va 40 million so‘m mablag‘i evaziga og‘zaki kelishuv asosida Cobalt sotib olib, chuv tushdi. Ayni kunda u Spark mashinasi va 40 million so‘m pulidan ham ajralib qoldi. Bu haqda “Daryo”ga shikoyat qilgan fuqaroning aytishicha, uni aldab ketgan fuqaro Spark va 40 million so‘m pul olganini tan olgan. Biroq “qo‘lingdan kelganiga qil”, deya qaytarib bermasligini aytgan.

“Mazkur masala yuzasidan ko‘plab tashkilotlarga shikoyat qilib, aldab ketishganini, yordam berishlarini so‘radim. Ammo natija yo‘q”, — deydi viloyatning Qarshi tumanida yashovchi Sherzod Rahmatov.

Murojaatchining maʼlum qilishicha, u 2022-yilning 7-iyul kuni Jamshid Ulashov ismli fuqarodan Cobalt avtomobilini sotib olgan.

Jamshid Ulashovning Cobalt mashinasini sotib olib, o‘rniga o‘zimning Spark avtomobilim va 40 million so‘m pul berdim. O‘sha kuni Qarshi shahridagi 1-sonli notariusga borib, “generalniy dovernost” qilib oldim. Notariuslar mening mashinani sotib olganimni bilsa-da, bu ham hujjat deyishdi. Ikki yil shu hujjat bilan mashinani haydab yuraverasiz, deyishdi. 2023-yilning 26-fevral kuni mashinaning asl egasi Rahima Fayziyeva ushbu hujjatni bekor qilish bo‘yicha ariza bergan ekan. Shu sabab Jamshid Ulashov hamda va ikki nafar “GAI” xodimi kelib, mening mashinamni tortib olishdi, — deydi muammo haqida gapirgan fuqaro.

Sherzod Rahmatovning aytishicha, sotib olgan mashinasi Qarshi shahridagi bozor hududida tortib olingan.

Cobalt mashinasi o‘rniga mendan Spark va 40 million so‘m olgan fuqaroning bu haqda tilxati bor. U mendan Spark mashina olganini, ustiga qo‘shimcha yana 40 million so‘m pul olganini ham yozib, tilxat bergan. Bugungi kunga kelib, puling va mashinangni oldim, qaytarib ham bermayman, xohlagan joyingga bor, deyapti. Menga hech qaysi tashkilot yordam bermayapti, — deydi murojaatchi.

Qo‘shimcha qilinishicha, Jamshid Ulashov tomonidan Sherzod Rahmatovga sotilgan Cobalt hujjatga ko‘ra, Rahima Fayziyevaniki bo‘lgan.

Bu ayol mashinasini dastlab “generalniy dovernost” asosida Jamshid Ulashovga sotgan. Rahima Fayziyeva tilxatida Jamshid Ulashovdan Cobalt uchun 74 million so‘m pul olganini, Jamshid Ulashovning mashinani sotishiga ham qarshi emasligini yozgan. Shundan so‘ng Jamshid Ulashov mashinani menga sotgan. Men ham, Jamshid Ulashov ham mashinani sotib olganimizda oldi-sotdi shartnoma qilmaganmiz. Shu sababmi, opa “ganeralniy dovernost”ni 2022-yilning 28-dekabr kuni bekor qilgan ekan, — deydi murojaatchi.

Ayni kunga kelib, puli va mashinasiga kuyib qolayotganini aytgan murojaatchi muammo yuzasidan Qarshi shahar, tuman hamda viloyat prokuraturasiga murojaat qilganini, notariuslar ustidan Adliya boshqarmasiga shikoyat kiritganini, ammo natijasi yo‘qligini aytmoqda.

Bu muammoni sud ham ko‘rib chiqdi. Sud mashina egasi Fayziyeva bo‘lgani uchun mashina unga qaytarilishi kerakligini aytgan. Lekin mendagi Fayziyevaning tilxati, Jamshid Ulashovlarning tilxatiga eʼtibor qaratmayapti. Jamshid Ulashov esa opa bilan o‘zlaring kelishib olinglar, demoqda. Tilxatlar ham, hujjatlar ham o‘tmayapti, — deydi murojaatchi.

“Daryo” voqealar rivojini kuzatishda davom etadi.