“Қотиллик ҳеч қачон ўзидан ўзи содир бўлмайди”. Раҳмат Маматов Самарқандда ўлдирилган 23 ёшли йигит воқеаси ҳақида

Самарқанд вилоятининг Паст Дарғом туманида 23 ёшли йигит пичоқлаб ўлдирилди. Воқеа марҳумнинг амакиваччаси билан тортишувидан келиб чиққан. Бу ҳақда “Дарё”га вилоят ИИБ ахборот хизмати раҳбари Жаҳонгир Сагдуллаев хабар берди.

Маълум бўлишича, воқеа 2023 йилнинг 1 август куни содир бўлган.

“Паст Дарғом туманининг ‘Чортут’ маҳалласида содир бўлган қотиллик юзасидан вилоят Ички ишлар бошқармаси бошлиғи Раҳмат Маматов иштирокида муҳокама йиғилиши бўлиб ўтди. Унда туман ҳокимлиги, мутасадди ташкилотлар, жамоатчилик вакиллари ва маҳалла аҳли иштирок этди. Амакиваччаларнинг ўзаро келишмовчилиги пичоқбозликка айланиб кетган. Оқибатда бири ҳаётдан бевақт кўз юмди”, — дейди Жаҳонгир Сагдуллаев.

Аниқланишича, пичоқланиши оқибатида вафот этган марҳум М.С. 23 ёш, гумонланувчи эса 28 ёшда бўлган.

“Ёшлар масалалари ҳар доим ҳам давлат ва жамият учун муҳим ҳисобланган. Эртамиз эгаларининг феъл-атвори, билими ва дунёқараши, жамиятда тутган ўрни, энг асосийси келажаги ҳеч биримизни бефарқ қолдирмаслиги лозим. Нима учун кейинги вақтларда ёшлар жиноятчилиги ортди? Унинг сабаблари таҳлил қилинганида, аксарият ёшларнинг касб-ҳунар ўрганмасдан, таълим олмасдан бекор юришгани сабаб бўлаётгани маълум бўлмоқда”, — дейди муҳокама йиғилишида сўз олган вилоят ИИБ бошлиғи Раҳмат Маматов.

Қайд этилишича, воқеа юзасидан туман прокуратураси томонидан Жиноят кодексининг 97-моддаси (қасддан одам ўлдириш) билан жиноят иши қўзғатилиб, гумонланувчи процессуал тартибда ушланган.