Улуғбек Қодиров бу йил 40 ёшни қаршилаган бўлишига қарамай ҳамон ошиқ йигитлар ролини маромига етказиб ижро этади. Маълум сабабларга кўра, бир муддат ижоддан йироқлашган актёр яна кинога қайтди. Тасодифан санъат оламига кириб келган Улуғбек Қодиров фаолияти давомида қандай қийинчиликларга учраган. Келинг, бу ҳақда атрофлича маълумот берамиз.
“Кўричак сабаб ҳарбий бўлолмаганман”
Носир ва Фарида Қодировалар кенжа ўғилларининг ҳарбий соҳа вакили бўлишини орзу қилишади. Чунки унинг бўйлари баланд, спортга бўлган қизиқиши ҳам юқори эди. Афсуски, ёш Улуғбекка ҳарбий бўлиш насиб этмади.
— Ота-онам ҳақиқатан ҳам ҳарбий бўлишимни орзу қилишганди. 15 ёшимда Тошкентдаги Суворов номли ҳарбий билим юртига ўқишга кирдим, аммо уни битириш менга насиб қилмади. Кутилмаганда кўричак бўлиб қолдим. Жарроҳлик операциясидан кейин шифокорлар жисмоний машқлар бажаришни маълум муддатга тақиқлашди. Ота-онам мени оддий мактабга қайтаришга қарор қилишди. Шундай қилиб, ҳарбийлик касби ҳақидаги орзу ўз-ўзидан барҳам топди. Аммо болалигимдан спортга қизиқишим юқори бўлган. Аммо ўзим ҳам, атрофимдаги инсонлар ҳам актёр бўлишимни хаёлларига келтиришмаган.
Болалигим бошқаларникидан фарқли ўтган деёлмайман. Ота-онам кун бўйи ишда бўлишарди, биз эса уйда қолардик. Онам уй ишларини барчамизга бўлиб кетарди. Ҳамма зиммасига юклатилган ишни қилишга мажбур эди. Дадам ўқимишли инсон бўлгани учун “Саодат” журналига обуна бўларди. Ишга кетаётганда журналнинг қайси саҳифаларини ўқишимизни ҳам белгилаб кетишарди, — дейди актёр Улуғбек Қодиров.
“Артист бўламан, қоним тўкилди”
Санъат институтига ҳужжатларимни тасодифан топширганман. Институт биноси олдида рўй берган воқеани тақдирнинг белгиси сифатида қабул қилганман.
— Баҳорнинг илиқ кунларининг бирида дўстларим билан Тошкентдаги Алишер Навоий номли миллий боғга айлангани бордик. Ўша кунлари онам менга янги пойабзал олиб бергандилар. Кўп юрганимдан туфли оёғимни шилиб ташлади. Аммо юришдан тўхтамадим. Шунда хаёлимга санъат институтининг олдига етиб олсам бўлди, деган фикр келди. Институт биноси олдига етиб борганимда, оёғим янада, кўпроқ қонай бошлади. Бу қон институт дарвозаси олдига тўкилди. Ўша куни кечқурун онамга “Санъат институтига ҳужжат топшираман!” деб айтдим. Онам “Бу нима деганинг?” деб ҳайрон бўлдилар. “Қоним тўкилган жойга ўқишга кирмасам бўлмайди” дея жавоб берганман”, — дейди Улуғбек Қодиров.
“Илк ролим эпизод бўлган”
Актёр 2000 йил Ўзбекистон давлат санъат ва маданият институтига қабул қилинган. У институтнинг энг кўркам талабаларидан бири бўлишига қарамай, кўпчилик унинг саҳнага мослашиб кетишига шубҳа қилганди. Бунга актёрнинг инжиқлиги ва бир оз жиззакилиги сабаб бўлган бўлса ажабмас.
— Илк ролимни 2001 йили “Аёл зоти” сериалида ижро этганман. “Кастингдан ўтдинг”, дейишганида роса хурсанд бўлгандим. Аммо кичик эпизодга тасдиқлашган экан. Камера қаршисида ҳаяжон албатта бўлган, аммо ролга мослашишим қийин кечмаган. 2004 йили институтни битиргандан сўнг кетма-кет янги фильмларга таклифлар бўлди. “Девона” ва “Сарвиноз” фильмларида суратга тушганимдан кейин одамлар таний бошлашди, — дейди актёр.
“Отамдан айрилиб қолдик”
Актёрнинг муваффақиятли роллари кўп, аммо унинг танилишида “Сарвиноз” ва “Бахт учун миллион” роллари кўпроқ ҳисса қўшган. Чунки 2005 йилда унга “Йилнинг энг яхши актёри” номинациясида ғолиблик насиб этган.
— 2004 йили ижодимдаги энг баракали йиллардан бири бўлган. Аммо ҳаётимда оғир жудолик бўлгани билан ҳам хотирамда қолиб кетган. Чунки энди танилиб, фильмларим намойиш этилаётган паллада отамдан айрилиб қолганмиз. Отамга фильмларимни кўриш, премьераларда олд қаторда ўтириб, томоша қилиш насиб этмаган. Бундан кўп афсусланаман, — дейди актёр Улуғбек Қодиров.
Улуғбек Қодиров бир ой яшаб, ажрашган...
Актёр Улуғбек Қодиров 2012 йилнинг сентябрь ойида ота-онасининг қистови билан уйланган. Тўй катта дабдаба билан ўтган бўлишига қарамай, куёв бир ойдан кейин ажрашишга қарор қилган. Миш-мишларга қараганда, бунга келинни ёқтирмай уйлангани сабаб бўлган. 2013 йилнинг апрель ойида эса актёр “Шаҳризода” гуруҳининг аъзоси Азиза билан оила қурган. Улар 2014 йили қиз, 2016 йилда эса ўғил фарзандли бўлишганини маълум қилишди.
Рол учун 25 кг вазн йўқотган
Актёр Улуғбек Қодиров учун қисқа муддатда озиш ёки семириш муаммо эмас. У “Ака” фильми учун 26 килограммга семирган. “Барон” фильми учун эса аввалги вазнига қайтишига тўғри келган. Актёр қисқа вақтда 25 килограмм вазн ташлашга муваффақ бўлган. Актёрнинг таъкидлашича, у тўплаган 120 килограмм вазндан рол ва саломатлиги учун воз кечишига тўғри келган.
— Бу йил ҳам рол учун катта вазн ташлашимга тўғри келди. “Осиё арслони” фильмида асосий ролни ижро этяпман. Кучайтирилган парҳез сабаб 25 килограмм вазн ташладим, — дейди актёр Улуғбек Қодиров.
“Улуғбекни Ўзбекистонда хафа қилишганди”
Улуғбек Қодиров оиласи билан АҚШга кўчиб кетганлиги маълум қилганди. Аммо бирор марта хорижга кетишининг сабабларини очиқламади. Фақатгина унинг яқин дўсти ва спорт мураббийси Ҳабибулла Низомов бунинг айрим сабабларини маълум қилганди.
— Фильмларда ўзбек актёрларига салбий рол ёки иккинчи даражали ролларни бериб, асосий роллар рус ёки турк актёрларига берила бошлади. Бир фильмда келишилган гонорарни беришмаган. Қайта-қайта сўраб, агар пулимни бермасангиз, дубляжга бормайман, деганидан кейин кинони буюртма қилган ташкилотга рўпара қилиб қўйган. Тасаввур қилинг, гонорарни келишган одам қўрқитиш учун бошқа ташкилотни рўпара қилиб қўйган. Балки, адолатсизликларни кўриб, мен ўзим янгидан ҳаёт бошлаб, алоҳида яшаб кўрай, дегандир, — деганди Ҳабибулла Низомов.
АҚШда пицца тарқатиш билан шуғулланганми?
Актёр бирорта интервьюсида АҚШдаги фаолияти ҳақида гапирмаган бўлса-да, тиниб-тинчимас мухлислар унинг нима билан шуғулланганлигини аниқлашган. У барча муҳожирлар сингари пицца тарқатиш билан шуғулланган эмиш.
Муҳими, актёр 3-4 йиллик хориж сафаридан сўнг Ўзбекистонга қайтди ва айни кунларда “Алфонс” сериалида суратга тушмоқда.
Изоҳ (0)