Вазирлар Маҳкамасининг “Коллеж ва техникумларда касб ва мутахассислик эгаллаш истагида бўлган хотин-қизларни қўллаб-қувватлаш чора-тадбирлари тўғрисида”ги қарори лойиҳаси жамоатчилик муҳокамаси учун эълон қилинди.
![](/static/nigora/talaba qiz.jpg)
Унга кўра, 2023/2024-ўқув йилидан бошлаб коллеж ва техникумларда қурилиш, транспорт, коммунал, қишлоқ хўжалиги ва хизмат кўрсатиш соҳаларидаги касб ва мутахассисликларда ўқийдиган 3 ёшгача фарзанди бўлган ўқувчи-қизларга, уларнинг мурожаати асосида масофавий таълим олиш имконияти яратилади.
Олий таълим, фан ва инновациялар вазирлиги масофавий таълим олиш имконияти яратиладиган касб ва мутахассисликлар рўйхатини тасдиқлайди.
Шунингдек, 2023/2024-ўқув йилидан бошлаб қурилиш, транспорт, коммунал, қишлоқ хўжалиги ва хизмат кўрсатиш соҳаларидаги касб ва мутахассисликларда ўқиш истагида бўлган хотин-қизлар тўлиқ давлат гранти асосида таълим олади ҳамда уларнинг харажатлари тўлиқ давлат бюджети маблағлари ҳисобидан қопланади.
Иқтисодиёт ва молия вазирлиги Олий таълим, фан ва инновациялар вазирлиги томонидан тақдим этилган рўйхатга кўра 2023 йилда тизимда профессионал таълим муассасаларига ажратилган маблағлар доирасида 2024 йилдан бошлаб давлат бюджети параметрларида алоҳида маблағлар ажратилишини таъминлайди.
Ушбу ҳужжат лойиҳаси муҳокамаси 4 августгача давом этади.